जळगाव : पत्नीचा लाकडी दांडा डोक्यात मारुन खून करणाऱ्या पतीला जळगाव जिल्हा व सत्र न्यायालयाने काल (१९ मे) जन्मठेपेची शिक्षा व ५ हजार रुपयांचा दंड ठोठावला आहे. पप्पू रतन पवार (वय ३१ रा. पाचोरा) असे शिक्षा झालेल्या आरोपीचे नाव आहे. त्याने पत्नी कस्तुराबाई पप्पू पवार (वय ३०) यांचा खून केला होता. प्रत्यक्षदर्शी साक्षिदार असलेल्या आरोपीच्या सात वर्षाच्या मुलीची साक्ष या खटल्यात महत्वाची ठरली.

आरोपी पप्पु रतन पवार हा त्याची पत्नी कस्तुराबाई व तीन मुलींसह पाचोरा येथील विवेकानंद नगर तांडा येथे राहत होता. पाचोरा येथील एका हॉटेलवर पप्पू काम करत होता. त्याला दारू पिण्याचे व्यसन होते. पप्पु आणि कस्तूराबाई यांना तीनही मुली असल्यामुळे पप्पू नेहमी कस्तूराबाई यांना दोष द्यायचा आणि मुलगा होत नाही या कारणावरुन वेळावेळी कस्तूराबाई यांना मारहाण करायचा. ९ जून २०१९ रोजी रात्री पप्पू पवारने ‘तुला मुलीच होतात’ असे म्हणत पत्नी कस्तुराबाईशी भांडण सुरु केले, नंतर तिला शिवीगाळ केली आणि रागाच्या भरात लाकडी दांडक्याने तिच्या डोक्यात मारले. त्यात कस्तूरीबाई यांचा मृत्यू झाला. याप्रकरणी कस्तूराबाई यांची आई पद्माबाई सखाराम राठोड (वय ६० रा. आनंद नगर तांडा) यांच्या फिर्यादीवरुन पाचोरा पोलीस स्टेशनला भा. दं. वि. कलम ३०२, ५०४ अन्वये गुन्हा दाखल करण्यात आला.

या घटनेच्या दुसर्‍या दिवशी पोलिसांनी आरोपी पप्पू पवार याला अटक केली. गुन्हा घडल्यापासून आरोपी पती कारागृहातच होता. तपास अधिकारी पोलिस उपनिरीक्षक पंकज शिंदे यांनी तपास पूर्ण करुन या गुन्ह्याचे दोषारोपपत्र जिल्हा न्यायालयात दाखल केले होते. खटल्यावर सर्वप्रथम तत्कालीन प्रमुख जिल्हा व सत्र न्यायाधीश जी. ए.सानप याच्या समोर कामकाज चालले. त्यांच्या समक्ष या खटल्यात सरकारी पक्षातर्फे जिल्हा सरकारी वकील केतन ढाके यांनी आठ साक्षीदार तपासले. त्यानंतर डिसेंबर २०२० मध्ये प्रमुख जिल्हा व सत्र न्यायाधीश एस.डी. जगमालानी यांच्या समोर सरकारी पक्षाने उर्वरित दोन साक्षीदार तपासून खटल्याचे काम पूर्ण केले.

या खटल्यात प्रामुख्याने आरोपीची सात वर्षांची मोठी मुलगी गौरी हिची साक्ष महत्वपुर्ण ठरली. ही सर्व घटना तिच्या समोर घडलेली होती. तिने सर्व घटनाक्रम न्यायालयासमोर सांगितला. न्यायालयाने तिला विचारले, मारहाण करणारा व्यक्ती कोण आहे ? तेव्हा तिने तिच्या वडिलांकडे बोट दाखवले. या व्यतिरिक्त फिर्यादी पद्माबाई राठोड, डॉ. निलेश देवराज, पंच साक्षीदार व पोलीस उपनिरिक्षक पंकज शिंदे यांच्या देखील साक्षी नोंदविण्यात आल्या. न्यायालयाने आरोपी पप्पु पवार याला पत्नी कस्तुराबाई यांचा खून केल्याप्रकरणी दोषी ठरवून जन्मठेपेची व ५ हजार रुपये दंडाची शिक्षा ठोठावली.

RTPCR चाचणीसाठी नाक आणि तोंडातून स्वॅब घेण्याची गरज नाही, वापरणार ‘ही’ सोपी पद्धत

‘लिव्ह इन रिलेशनशीप’ अस्वीकारार्ह, जोडप्याला सुरक्षा देण्यास उच्च न्यायालयाचा नकार

The post ‘तुला मुलीच होतात’ असे म्हणत केली पत्नीची हत्या, सात वर्षांच्या मुलीने दिली वडिलांविरोधात साक्ष आणि.. appeared first on थोडक्यात घडामोडी.

यवतमाळ : आजोबाने 11 वर्षीय नातीवरच अत्याचार केल्याची संतापजनक घटना घाटंजी तालुक्यात घडली होती. या गुन्ह्यात जिल्हा सत्र न्यायालयाने बाललैंगिक शोषण प्रतिबंधक कायदा 2012 (पोक्सो) प्रमाणे आरोपी आजोबाला सक्तमजुरीसह आमरण जन्मठेपेची शिक्षा ठोठावली आहे.

पीडित मुलीच्या आईचा मृत्यू झाला होता. ती लहान बहिणीसह वडिलांसोबत राहत होती. तिचे आजोबा मारेगाव तालुक्यातील एका गावात राहत होते. उन्हाळ्याच्या सुट्ट्या लागल्याने पीडित मुलगी आणि बहिण आजोबांकडे राहायला गेल्या. तिथे आजोबाने वारंवार पीडितेवर अत्याचार केला. ही बाब कुणाला सांगू नकोस म्हणून तिला धमकी दिली. काही दिवसांनी पीडित मुलगी पुन्हा वडिलांकडे राहायला आली. मात्र दुर्दैवाने काही दिवसातच तिचे वडील मरण पावले. त्यामुळे तिचे आजोबा तिच्याच घरी येऊन राहायला आले. तिथेही या आजोबाने नातीवर वारंवार अत्याचार केले. यातूनच पीडितेला गर्भधारणा झाली.

आजोबाने धमकावल्यामुळे पीडितेने याबाबत कुठेही वाच्यता केली नाही. मात्र, 15 ऑगस्टच्या दिवशी शाळेच्या झेंडावंदन कार्यक्रमामध्ये पीडिता शाळेत चक्कर येऊन पडली. तेव्हा तिच्या आजीने आणि गावचे सरपंच यांनी तिची विचारपूस केली. तेव्हा तिने आजोबाने तिच्यावर वारंवार अत्याचार केल्याचे सांगितले आणि हे प्रकरण उघडकीस आले.

22 ऑक्टोबर 2019 रोजी पीडिता मुलीच्या आजीने (आईची आई) घाटंजी पोलिस ठाणे येेथे या संदर्भात तक्रार दिली. आरोपी आजोबा तिच्या वडिलांचा वडील आहे. या प्रकरणात सात साक्षीदार तपासण्यात आले. यात पीडित मुलगी, तिची आजी व वैद्यकीय अधिकार्‍यांची साक्ष महत्वाची ठरली. जिल्हा व सत्र न्यायाधीश मोहिउद्दीन यांनी आरोपीस सक्तमजुरीसह आमरण जन्मठेपेची शिक्षा सुनावली.

The post 11 वर्षीय नातीवर अत्याचार करणाऱ्या ‘त्या’ नराधम आजोबाला जन्मठेपेची शिक्षा appeared first on थोडक्यात घडामोडी.

चोरीचा बनाव करुन स्वत:च्या पत्नीचा खून करणाऱ्या पतीस बार्शी सत्र न्यायलयाने जन्मठेपेची शिक्षा सुनावली आहे. उस्मानाबाद जिल्ह्यातील कोंबडवाडी येथील मनिषा फुगारे हिचा खामसवाडी येथील महेश मिसाळ याच्याबरोबर 7 मे 2017 रोजी विवाह झाला होता. लग्नानंतर दोघेही पुण्यात राहत होते. मनिषाला आपला पती सतत एका महिलेशी फोनवरुन बोलत असल्याचे लक्षात आले. त्याबाबत तिने आपल्या माहेरी देखील सांगितले होते.

2 जानेवारी 2018 रोजी महेश मनिषाला घेऊन अचानक तिच्या माहेरी गेला. तिथून तो मनिषाला घेऊन बार्शीतल्या पाथरी येथे आपल्या बहिणीकडे गेला. संध्याकाळी परत येत असल्याचे मनिषाचे वडील दादाराव फुगारे यांना फोनवरुन सांगितले. मात्र उशीर झाला तरीही मुलगी-जावई न आल्याने दादाराव यांनी फोन लावण्याचा प्रयत्न केला. मात्र दोघांचे फोन लागत नव्हते. त्यामुळे दादाराव नातेवाईंकासह त्यांना शोधण्यासाठी निघाले.

रात्री येरमाळ्याजवळ रस्त्याच्या कडेला जावयाची दुचाकी पडलेली आढळली. तिथे मनिषाचा मृतदेह देखील सापडला. मनिषाच्या डोक्यावर गंभीर जखमा होत्या. मात्र महेश तिथे नव्हता. त्यामुळे त्यांनी जवळच असलेल्या पांगरी पोलिस ठाण्यात धाव घेतली. त्यानंतर त्यांना त्यांचा जावई उस्मानाबाद येथील शासकीय रुग्णालयात दाखल असल्याचे कळले. महेश याला विचारणा केली असता चोरट्यांनी आपल्यावर हल्ला केला. त्यात आपण जखमी झालो आणि मनिषाचा मृत्यू झाला असे त्याने सांगितले. मात्र हे प्रकरण पांगरी पोलिस ठाण्याचे तत्कालीन स.पो.नि. धनंजय ढोणे यांना शंकास्पद वाटले. महेशच्या अंगावर असणाऱ्या जखमा किरकोळ होत्या.

धनंजय ढोणे यांनी महेश मिसाळ याची कसून चौकशी केली असता त्याने हत्येची कबुली दिली. लग्नापूर्वीच नात्यातील एका मुलीसोबत आपले प्रेमसंबंध होते. तिच्यासोबत लग्न करायचे होते. मात्र पत्नी मनिषा ही गर्भवती होती आणि ती लग्नाला अडसर ठरत होती. त्यामुळे डोक्यात दगड मारुन आणि चाकूने हल्ला करुन खून केल्याची कबुली आरोपी महेश मिसाळ याने कोर्टात दिल्याची माहिती सरकारी वकील अॅड. शांतवीर महिंद्रकर यांनी दिली. या प्रकरणी एकही प्रत्यक्षदर्शी पुरावा नव्हता, मात्र केवळ परिस्थितीजन्य पुरावे व्यवस्थितपणे सादर केल्याने न्यायालयाने जन्मठेपेची शिक्षा आणि 25 हजार रुपये दंडाची शिक्षा सुनावली आहे.

The post सोलापूर : गर्भवती पत्नीचा खून करणाऱ्या पतीस न्यायालयाने दिली जन्मठेपेची शिक्षा appeared first on थोडक्यात घडामोडी.