मुंबई : राष्ट्रवादी काँग्रेसचे ज्येष्ठ नेते आणि आमदार छगन भुजबळ यांनी आज राजभवन येथे राज्याच्या कॅबिनेट मंत्रिपदाची आणि गोपनीयतेची शपथ घेतली. महायुती सरकार स्थापन झाल्यानंतर सुरुवातीच्या मंत्रिमंडळात त्यांना डावलण्यात आले होते. मात्र, सुमारे सहा महिन्यांच्या प्रतीक्षेनंतर भुजबळ यांचे मंत्रिमंडळात पुनरागमन झाले आहे.

धनंजय मुंडे यांच्या राजीनाम्यानंतर रिक्त झालेल्या मंत्रिपदासाठी भुजबळ यांची निवड करण्यात आली आहे. बीड जिल्ह्यातील मस्साजोग गावातील सरपंच संतोष देशमुख प्रकरणात आरोपींना अटक झाल्यानंतर, तत्कालीन मंत्री धनंजय मुंडे यांच्यावर संबंधित आरोपींशी जवळीक असल्याचे आरोप झाले होते. या पार्श्वभूमीवर त्यांनी मार्चमध्ये मंत्रिपदाचा राजीनामा दिला होता.

त्यानंतर राष्ट्रवादीच्या वाट्याच्या मंत्रिपदाची जागा रिक्त होती. दुसरीकडे, मंत्रिमंडळात सहभागी न झाल्याने छगन भुजबळ यांची नाराजी शिगेला पोहोचली होती. इतकी की, ते पक्ष सोडणार असल्याच्या चर्चा देखील सुरू झाल्या होत्या. अखेर, पक्षांतर्गत समेटानंतर भुजबळ यांना मंत्रिमंडळात पुन्हा स्थान देण्यात आले आहे.

भुजबळ यांच्याकडे अन्न व नागरी पुरवठा आणि ग्राहक संरक्षण खात्याची जबाबदारी सोपवण्यात येणार असल्याची शक्यता आहे. याआधीही त्यांनी हे खाते सांभाळले असून, त्यांच्या अनुभवाचा सरकारला फायदा होईल, अशी राजकीय वर्तुळात चर्चा आहे.

The post छगन भुजबळ यांचे मंत्रिमंडळात पुनरागमन, घेतली कॅबिनेट मंत्रिपदाची शपथ appeared first on थोडक्यात घडामोडी.

नागपूर : छगन भुजबळ यांनी मुख्यमंत्री देवेंद्र फडणवीस सरकारच्या मंत्रिमंडळ विस्तारावर नाराजी व्यक्त केली आहे. ”जरांगेंना अंगावर घेण्याचं बक्षीस मला मिळालं आहे. नव्यांना संधीसाठी ज्येष्ठांना डावललं जातंय. मी एक सामान्य कार्यकर्ता आहे. मला डावललं काय आणि फेकलं काय, मला काही फरक पडत नाही. असं मंत्रिपद कितीवेळा आलं आणि कितीवेळा गेलं, पण मी कधी संपलेलो नाहीय. पण मी नाराज आहे. ज्यांनी मला डावललं त्यांना कारण विचारा. ओबीसींच्या लढ्यामुळेच महायुतीला यश मिळालं”, असं म्हणत छगन भुजबळांनी आपली नाराजी स्पष्ट जाहीर केली आहे.

मुख्यमंत्री फडणवीस यांच्या सरकारचा मंत्रिमंडळ विस्तार रविवारी झाला. या मंत्रिमंडळ विस्तारात राष्ट्रवादी काँग्रेसकडून नऊ जणांनी मंत्रिपदाची शपथ घेतली. त्यात अनेक नवीन चेहऱ्यांना संधी देण्यात आली. मात्र त्यासाठी दिलीप वळसे पाटील, छगन भुजबळ यांच्यासारख्या दिग्गज नेत्यांना डावलण्यात आले. मंत्रिमंडळात स्थान न मिळाल्यामुळे छगन भुजबळ नाराज झाल्याची चर्चा आहे. या पार्श्वभूमीवर राष्ट्रवादी काँग्रेसने भुजबळ यांची नाराजी दूर करण्याचे प्रयत्न सुरु केले आहेत. त्यासाठी राष्ट्रवादी पक्षाचे उपाध्यक्ष आणि उपमुख्यमंत्री अजित पवार यांचे निकटवर्तीय प्रमोद हिंदूराव यांनी हॉटेल रेडिसन ब्ल्यू येथे जाऊन भुजबळ यांची भेट घेतली.

The post ज्यांनी मला डावललं त्यांना कारण विचारा…, छगन भुजबळांनी जाहीर केली नाराजी appeared first on थोडक्यात घडामोडी.

नागपूर : विधानसभा निवडणुकीत महायुतीला स्पष्ट बहुमत मिळाल्यानंतर ५ डिसेंबरला नव्या मंत्रिमंडळाचा शपथविधी सोहळा पार पडला होता. मात्र मंत्रिमंडळ विस्तार रखडला होता. अखेर आज मंत्रिमंडळ विस्तार पार पडला आणि नागपूरमध्ये नव्या मंत्र्यांचा शपथविधी सोहळा संपन्न झाला. यावेळी भाजपच्या १९ मंत्र्यांनी, शिवसेना शिंदे गटाच्या ११ आणि राष्ट्रवादी अजित पवार गटाच्या ९ मंत्र्यांनी शपथ घेतली.

विधानसभा निवडणुकीत भाजपने १३२ जागा जिंकून पहिलं स्थान मिळवलं. राष्ट्रवादी अजित पवार गटाला ४१ आणि शिवसेना शिंदे गटाला ५७ जागांवर विजय मिळाला. मंत्रिमंडळ विस्ताराची प्रचंड उत्सुकता होती, कारण कोणाला संधी मिळणार आणि कोणाचा पत्ता कट होणार याकडे सर्वांचं लक्ष लागलं होतं. अखेर, नव्या मंत्र्यांची यादी जाहीर झाली.

यावेळी मंत्रिमंडळात काही नव्या चेहऱ्यांना संधी मिळाली, तर काही अनुभवी नेत्यांचा पत्ता कट झाला. राष्ट्रवादीचे छगन भुजबळ आणि दिलीप वळसे पाटील यांचा समावेश नव्या मंत्रिमंडळात नाही. तसेच शिवसेना शिंदे गटाचे दीपक केसरकर यांचं नावही यादीत नाही. भाजपकडून रवींद्र चव्हाण यांना मंत्रिमंडळात स्थान नाही.

नव्या मंत्र्यांची यादी:
भाजप:
– चंद्रशेखर बावनकुळे
– राधाकृष्ण विखे पाटील
– चंद्रकांत पाटील
– गिरीश महाजन
– गणेश नाईक
– मंगलप्रभात लोढा
– जयकुमार रावल
– पंकजा मुंडे
– अतुल सावे
– अशोक उईके
– आशिष शेलार
– संजय सावकारे
– नितेश राणे
– आकाश फुंडकर
– माधुरी मिसाळ – राज्यमंत्री
– पंकज भोयर – राज्यमंत्री
– मेघना बोर्डीकर – राज्यमंत्री
– शिवेंद्रसिंहराजे भोसले

शिवसेना:
– गुलाबराव पाटील
– दादा भुसे
– संजय राठोड
– उदय सामंत
– शंभूराज देसाई
– संजय शिरसाट
– प्रताप सरनाईक
– भरत गोगावले
– प्रकाश आबिटकर
– आशीष जैस्वाल – राज्यमंत्री
– योगेश कदम – राज्यमंत्री

राष्ट्रवादी:
– हसन मुश्रीफ
– धनंजय मुंडे
– दत्तात्रय भरणे
– आदिती तटकरे
– माणिकराव कोकाटे
– नरहरी झिरवळ
– मकरंद जाधव
– बाबासाहेब पाटील
– इद्रनील नाईक

The post मंत्रिमंडळ विस्तार: नव्या मंत्र्यांचा शपथविधी, ‘या’ दिग्गज नेत्यांचा पत्ता कट appeared first on थोडक्यात घडामोडी.

मुंबई : राष्ट्रवादी काँग्रेसचे नेते छगन भुजबळ यांना कोरोनाची लागण झाली आहे. भुजबळ यांनी स्वतः याबाबत माहित दिली आहे.

भुजबळ म्हणाले की, “माझी कोरोना चाचणी पॉझिटिव्ह आली असून माझी प्रकृती उत्तम आहे.डॉक्टरांच्या सल्ल्यानुसार वैद्यकीय उपचार सुरू असून आपणा सर्वांच्या आशिर्वादाने कोरोनावर मात करून लवकरच मी बरा होईल. गेल्या काही दिवसांत माझ्या संपर्कात आलेल्या व्यक्तींनी काळजी घ्यावी व लक्षणे दिसल्यास तात्काळ कोरोना चाचणी करून घ्यावी. सर्वांना विनंती आहे की, कायम मास्क लावा आणि आपली व आपल्या परिवाराची काळजी घ्या.”

कोरोना चाचणी करून घ्यावी. सर्वांना विनंती आहे की, कायम मास्क लावा आणि आपली व आपल्या परिवाराची काळजी घ्या.

— Chhagan Bhujbal (@ChhaganCBhujbal) June 27, 2022

The post राजकारण्यांना कोरोनाचा विळखा! आता छगन भुजबळ यांना कोरोनाची लागण appeared first on थोडक्यात घडामोडी.

मुंबई : राष्ट्रीय अन्न सुरक्षा योजनेअंतर्गत राज्यात सात कोटी लाभार्थ्यांना लाभ मिळत आहे. राष्ट्रीय अन्न सुरक्षा अधिनियमांतर्गत जिल्हानिहाय उद्दिष्टांमध्ये सुधारणा केल्यानंतर राज्यात 25 लाख 05 हजार 300 अंत्योदय अन्न योजना शिधापत्रिकाधारकांना तर 5 कोटी 92 लाख 16 हजार प्राधान्य कुटुंब लाभार्थींना सवलतीच्या दरात अन्नधान्य योजनेचा लाभ मिळणार आहे. अशी माहिती अन्न,नागरी पुरवठा व ग्राहक हक्क संरक्षण मंत्री छगन भुजबळ यांनी दिली आहे.

राज्यासाठी 76.32 टक्के ग्रामीण(469.71लक्ष) व 45.34 टक्के शहरी ( 230.45लक्ष) असे एकूण 7 कोटी लाभार्थी संख्या निश्चित करण्यात आली आहे.

शिधापत्रिका व्यवस्थापन प्रणाली (RCMS) वरील माहितीच्या आधारे राष्ट्रीय अन्न सुरक्षा अधिनियमांतर्गत जिल्हानिहाय उद्दिष्टांमध्ये सुधारणा केल्यानंतर सध्या राज्यात अंत्योदय अन्न योजना शिधापत्रिकाधारकांची संख्या नाशिक, जळगाव, नंदूरबार, अमरावती, यवतमाळ, चंद्रपूर, गडचिरोली या सात जिल्ह्यात सर्वाधिक आहे. नाशिक जिल्ह्यातील अंत्योदय अन्न योजना शिधापत्रिकाधारक 1 लाख 78 हजार 563, तर प्राधान्य कुटुंबातील लाभार्थी संख्या 29 लाख 80 हजार 804,जळगांव जिल्ह्यात अंत्योदय अन्न योजना शिधापत्रिकाधारक 1 लाख 35 हजार 192 तर प्राधान्य कुटुंबातील लाभार्थी संख्या 22 लाख 19 हजार 690 ,नंदूरबार जिल्ह्यातील अंत्योदय अन्न योजना शिधापत्रिकाधारक 1 लाख 06 हजार 857 प्राधान्य कुटुंबातील लाभार्थ्यी संख्या 7 लाख 41 हजार 360,अमरावती जिल्ह्यातील अत्योंदय अन्न योजना शिधापत्रिकाधारक 1 लाख 25 हजार 632, तर प्राधान्य कुटुंबातील लाभार्थी संख्या 14 लाख 8 हजार 878 ,यवतमाळ जिल्ह्यातील अंत्योदय अन्न योजना शिधापत्रिकाधारक 1 लाख 32 हजार 603 तर प्राधान्य कुटुंबातील लाभार्थी संख्या 14 लाख 69 हजार 136 ,चंद्रपूर जिल्ह्यातील अंत्योदय अन्न योजना शिधापत्रिकाधारक 1 लाख 40 हजार 621 तर प्राधान्य कुटुंबातील लाभार्थी संख्या 10 लाख 74 हजार 240,गडचिरोली जिल्ह्यातील अंत्योदय अन्न योजना शिधापत्रिकाधारक 1 लाख 02 हजार 338 तर प्राधान्य कुटुंबातील लाभार्थी संख्या 4 लाख 57 हजार 869 लाभार्थ्यांना या योजनेचा लाभ होणार आहे. राज्यात एकूण 25 लाख 05 हजार 300 अंत्योदय शिधापत्रिकाधारक तर प्राधान्य कुटुंबातील लाभार्थी संख्या 5 कोटी 92 लाख 16 हजार यांना सवलतीच्या दरात योग्य व गरजू व्यक्तींना अन्नधान्य योजनेचा लाभ मिळणार आहे.

अंत्योदय अन्न योजना व प्राधान्य कुटुंब लाभार्थी सदस्यांचा सुधारित इष्टांक देण्याच्या दृष्टीने शिधापत्रिका व्यवस्थापन प्रणाली (RCMS) वर (Digitisation) संगणकीकरण करण्यात आलेल्या अंत्योदय अन्न योजना शिधापत्रिका व प्राधान्य कुटुंब लाभार्थी संख्येच्या राष्ट्रीय सुरक्षा अधिनियम, २०१३ अंतर्गत जिल्हानिहाय सुधारित इष्टांक देण्याची बाब शासनाच्या विचाराधीन होती. सुधारित इष्टांक देताना जिल्हा , शहर अथवा गाव हे घटक विचारात न घेता राज्य हा घटक विचारात घेऊन निर्णय घेण्यात आला आहे. राष्ट्रीय अन्न सुरक्षा अधिनियम 2013 नुसार पात्र असलेल्या शिधापत्रिकेवरील ज्येष्ठ महिलेच्या नावावर कुटुंबप्रमुख असा शिक्का मारण्याची खबरदारी यंत्रणेला घ्यावी लागणार आहे.राष्ट्रीय अन्न सुरक्षा अधिनियम अंतर्गत जिल्हानिहाय इष्टांक वाढीबाबतचा शासन निर्णय दिनांक 18 फेब्रुवारी 2022 रोजी निर्गमित करण्यात आला आहे. हा शासन निर्णय महाराष्ट्र शासनाच्या www.maharashtra.gov.in या संकेतस्थळावर उपलब्ध आहे.

The post राष्ट्रीय अन्न सुरक्षा योजनेच्या जिल्हानिहाय उद्दिष्टांमध्ये सुधारणा appeared first on थोडक्यात घडामोडी.

पुणे : भिडेवाडा येथे महात्मा फुले आणि क्रांतीज्योती सावित्रीबाई फुले यांनी पहिली मुलींची शाळा सुरू केली. या ऐतिहासिक वाड्याचा विकास करून याठिकाणी मुलींची शाळा निर्माण करण्यात येणार असल्याचे प्रतिपादन अन्न, नागरी पुरवठा व ग्राहक संरक्षणमंत्री छगन भुजबळ यांनी केले.

महात्मा फुले यांच्या पुण्यतिथीनिमित्त आयोजित कार्यक्रमात ते बोलत होते. यावेळी छत्तीसगडचे मुख्यमंत्री भूपेश बघेल, मध्यप्रदेशचे आमदार सिद्धार्थ कुशवाह, माजी आमदार पंकज भुजबळ, दिप्ती चौधरी, कमल ढोले पाटील, महाज्योतीचे संचालक दिवाकर गमे, जेष्ठ विचारवंत प्रा. हरी नरके, प्रशांत जगताप आदी उपस्थित होते.

भुजबळ म्हणाले, राष्ट्रीय स्मारक फुलेवाडा व सावित्रीबाई फुले स्मारकाच्या विस्तारीकरणासाठी आवश्यक जागेची भूमीसंपादन प्रक्रिया पूर्ण करुन या कामास तात्काळ प्रारंभ करण्यात येईल. सावित्रीबाई फुले पुणे विद्यापीठात क्रांतीज्योती सावित्रीबाई फुले यांचा पूर्णाकृती पुतळा बसविण्यात येणार आहे. सावित्रीबाईंच्या जयंतीदिनी पुतळ्याचे अनावरण करण्यात येणार आहे. यासंदर्भात आवश्यक त्या सर्व परवानग्या घेण्यात आल्या आहेत. महात्मा फुले, सावित्रीबाई फुले यांच्या विचाराचा वारसा जपण्याचे काम सर्वांनी करावे, असे आवाहन त्यांनी केले.

यावेळी छत्तीसगडचे मुख्यमंत्री बघेल व अन्न व नागरी पुरवठा मंत्री भुजबळ यांनी फुले वाड्यात महात्मा फुले व सावित्रीबाई फुले यांच्या पुतळ्यास अभिवादन केले. महात्मा फुले समता पुरस्काराने छत्तीसगडचे मुख्यमंत्री भुपेश बघेल यांचा गौरव करण्यात आला. बघेल म्हणाले, महात्मा फुले व क्रांतीज्योती सावित्रीबाई फुले यांनी केलेले समाजसुधारणेचे कार्य महत्वपूर्ण आहे. समाजातील वंचित, मागास घटकासाठी त्यांनी कार्य केले. महिलांना समाजात सन्मान मिळावा, शेतकरी सुखी व्हावा याबाबतचा त्यांनी केलेले कार्य आजही तेवढेच महत्वपूर्ण ठरते. अशा महापुरुषांच्या नावाने सन्मान होणे ही आपल्यासाठी अभिमानाची बाब असल्याची भावना त्यांनी व्यक्त केली.

क्रांतिज्योती सावित्रीबाई फुले यांच्या पूर्णाकृती पुतळा जागेचे भूमिपूजन

सावित्रीबाई फुले पुणे विद्यापीठात क्रांतिज्योती सावित्रीबाई फुले यांचा पूर्णाकृती पुतळा बसविण्यात येणार आहे. आज अन्न व नागरी पुरवठा मंत्री छगन भुजबळ यांनी पूर्णाकृती पुतळ्याच्या जागेचे भूमिपूजन केले. यावेळी कुलगुरू डॉ. नितीन करमळकर, जेष्ठ विचारवंत प्रा. हरी नरके, मध्यप्रदेशचे आमदार सिद्धार्थ कुशवाह, माजी आमदार पंकज भुजबळ, माजी आमदार कमलताई ढोले पाटील, बापूसाहेब भुजबळ, मंजिरी धाडगे, नगरसेविका मनीषा लंडकत उपस्थित होते.

The post भिडेवाड्याचा विकास करून मुलींची शाळा निर्माण करण्यात येणार appeared first on थोडक्यात घडामोडी.

बीड : अन्न सुरक्षा कायद्याअंतर्गत शहरी व ग्रामीण भागातील प्रत्येक गरजूला शिधापत्रिका उपलब्ध करून देण्यात यावी आणि अशा पात्र लाभार्थ्यांना शोधून त्यांच्यापर्यांत अन्नधान्य पोहचावे. असे प्रतिपादन राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांनी केले. यावेळी सामाजिक न्याय व विशेष सहाय्य विभाग तथा पालकमंत्री धनंजय मुंडे यांची प्रमुख उपस्थिती होती.

बीड जिल्हा दौऱ्यावर आलेले राज्याचे अन्न, नागरी पुरवठा व ग्राहक संरक्षण मंत्री भुजबळ यांनी जिल्हा पुरवठा विभागाचा आढावा घेतला याप्रसंगी ते बोलत होते. यावेळी आ. संदीप क्षीरसागर, आ. संजय दौंड, जिल्हा पुरवठा अधिकारी भारती साखरे, तहसिलदार खाडे, अमरसिंह पंडित, सुभाष राऊत, संबंधित विभागाचे अधिकारी -कर्मचारी उपस्थित होते.

मंत्री भूजबळ यांनी जिल्हयातील व शहरातील शिवभोजन थाळी चालकांच्या अडचणी व शिवभोजन थाळी पूरवठयाविषयी माहिती घेवून शिवभोजन थाळी चालकांच्या थकीत देयकांविषयी की तांत्रिक समस्यांचे तातडीने सोडवणूक केली जावी यामुळे सदर थकीत देयके वेळेत अदा करणे शक्य होईल आणि जनसामांन्यांना शिवभोजन थाळीचा लाभ विनाअडथळा मिळेल असे मंत्री भुजबळ म्हणाले.

ते पुढे म्हणाले, शासनाने सार्वजनिक वितरण प्रणालीतून गरजू वंचित लाभार्थ्यांपर्यंत अन्नधान्य पोहचावे यासाठी अनेक पावले उचलली आहेत. यामुळे प्रत्येक लाभार्थ्यांला हक्काचे रेशनवरील अन्नधान्य मिळालेच पाहिजे. बायोमॅट्रीक मधील तांत्रिक अडचणीमुळे लाभार्थ्यांला रेशनच्या लाभापासून वंचित ठेवू नका. अन्न सुरक्षा कायदया अंतर्गत शहरी भागातील 59 हजार रू. व ग्रामीण भागातील 44 हजार रू. उत्पन्न असलेल्या प्रत्येक गरजूला शिधापत्रिका उपलब्ध करून देण्यात यावे. तसेच त्या लाभार्थ्यांना शोधून त्यांच्यापर्यांत अन्नधान्य पोहचावे.असे निर्देश अन्न व नागरी पुरवठामंत्री भुजबळ यांनी दिले.

स्थलांतरीत ऊसतोड कामगारांना संबंधित साखर कारखान्यांवर रेशन वरील अन्नधान्य आणि शिवभोजन थाळीचा लाभ द्यावा – पालकमंत्री धनंजय मुंडे यांची सूचना

बीड जिल्हयातील स्थलांतरीत ऊसतोड कामगारांचे राज्यातील इतर साखर कारखान्यांवर स्थलांतर होत असल्याने त्यांना रेशनवरील अन्नाधान्याच्या लाभापासून वंचित व्हावे लागते. त्यांना सदर लाभहा स्थलांतरीत झालेल्या संबंधित साखर कारखान्यावर देता यावा यासाठी यादया बनवून कारखाना प्रशासनाकडे पाठवा. तसेच रेशनवरील अन्नधान्य त्यांच्यापर्यंत पोहचावे, असे पालकमंत्री मुंडे म्हणाले.

तसेच या स्थलांतरीत ऊसतोड कामगारांसाठी शिवभोजन थाळीची सुविधा उपलब्ध करून दिली जावी, अशी सूचना मंत्री मुंडे यांनी केली.

यावेळी अन्न व नागरी पुरवठामंत्री भूजबळ यांनी बीड तालुक्यातील राशनच्या धान्यासंबंधी तक्रारींबाबत अधिकाऱ्यांकडून माहिती घेण्यात आली पुन्हा तक्रारी आल्यास कारवाई केली जाईल असे सांगितले. याप्रसंगी बीड तालूक्यातील पात्र लाभार्थ्यांना व गरजूंना लवकरात लवकर शिधापत्रिका उपलब्ध करून वाटप करा,अशा सूचना त्यांनी दिल्या.

The post अन्न सुरक्षा कायद्यानुसार प्रत्येक गरजू पात्र लाभार्थ्यांना शोधून त्यांच्यापर्यांत अन्नधान्य पोहाेचावे appeared first on थोडक्यात घडामोडी.

मुंबई : राज्यातील कोरोना प्रादुर्भावामुळे निर्माण झालेली परिस्थिती तसेच जुलै व ऑगस्टमध्ये राज्यात झालेली अतिवृष्टी लक्षात घेता आता शहरी भागातही नवीन रास्त भाव धान्य दुकाने सुरू करण्यात येणार आहेत. हा निर्णय अन्न,नागरी पुरवठा व ग्राहक सरंक्षण मंत्री छगन भुजबळ यांच्या प्रयत्नाने घेण्यात आला आहे.

राज्य शासनाकडून स्वस्त धान्य दुकानदारांच्या उत्पन्नात वाढ करण्याकरिता रास्त भाव दुकानांची पुर्नरचना करण्याबाबतची कार्यवाही यापूर्वी करण्यात आली होती मात्र या कार्यवाहीला लागणारा कालावधी लक्षात घेता सन २०१८ मध्ये शहरी भागात नवीन दुकाने वितरणाच्या जाहिरनाम्यास स्थगिती देण्यात आली होती ही स्थगिती आता उठविण्यात आली आहे त्यामुळे शहरी भागातही आता स्वस्त भाव धान्य दुकाने सुरू होणार आहेत.

सद्यस्थितीत कोरोना विषाणू संसर्गाने महाराष्ट्र राज्यात गरीब व गरजू लोकांना अनेक अडचणींना सामोरे जावे लागत आहे. शहरी भागातील अशी लोकसंख्या अधिक आहे. तसेच कोरोना या आजाराची तिसऱ्या लाटेची शक्यता नाकारता येत नाही. त्यामुळे या कालावधीत रास्तभाव दुकानांमार्फत राज्यातील गोरगरीब जनतेला अन्नधान्य तसेच केरोसिन वाटपाचे महत्त्वपूर्ण कार्य चालू ठेवणे अत्यंत आवश्यक आहे.तसेच राज्यात जुलै व ऑगस्ट पावसामुळे अनेक शहरात पुरसदृश परिस्थिती निर्माण झाली आहे.शहरी भागातील अनेक ठिकाणी नागरिकांच्या मालमत्तेचे नुकसान झाले आहे. अशा परिस्थितीत तेथे सरकारी मदत अन्नधान्याच्या स्वरूपात रास्त भाव दुकानदारांच्या माध्यमातून देणे अनिवार्य असून शहराची मुळ परिस्थिती पूर्वपदावर आणणे ही शासनाची जबाबदारी ठरते अशी माहिती अन्न,नागरी पुरवठा व ग्राहक सरंक्षण मंत्री छगन भुजबळ यांनी दिली आहे.

The post शहरी भागातील जनतेला मोठा दिलासा, शहरी भागातही नवीन रास्त भाव धान्य दुकाने सुरू करणार appeared first on थोडक्यात घडामोडी.

मुंबई : महाराष्ट्र सदन कथित घोटाळा प्रकरणी अन्न व नागरी पुरवठा मंत्री छगन भुजबळ यांची निर्दोष मुक्तता करण्यात आली आहे. लाचलुचपत प्रतिबंधक विभागाच्या(एसीबी) न्यायालयाकडे दोषमुक्त करण्यासाठी छगन भुजबळ आणि त्यांचा पुतण्या समीर भुजबळ यांनी अर्ज दाखल केला होता. आपल्यावर करण्यात आलले आरोप हे निराधार आहेत. त्यामुळे न्यायालयाने आपल्याला दोषमुक्त करावे असे भुजबळ यांनी म्हटले होते.

महाराष्ट्र सदन कथित घोटाळा प्रकरणी छगन भुजबळ आणि त्यांच्या कुटुंबियांविरोधात पुरावे असल्याचा दावा करत लाचलुचपत प्रतिबंधक विभागाने भुजबळ यांच्या प्रकरणातून दोषमुक्त करण्याच्या मागणीला विरोध केला होता. तर आपल्याविरोधात ठोस पुरावे नसल्याचा दावा करत भुजबळ आणि त्यांचे पुतणे समीर यांनी प्रकरणातून दोषमुक्त करण्याच्या मागणीसाठी अर्ज केला होता. मात्र भुजबळ आणि त्यांच्या कुटुंबियांना महाराष्ट्र सदनाच्या बांधकामाचे कंत्राट देण्यासाठी पैसे मिळाले होते याचा पुरावा असल्याचा दावा एसीबीने केला होता.

न्यायालयाने म्हटले आहे की एसीबीकडे आरोपींविरोधात कुठलेही सबळ पुरावे उपलब्ध नाहीत. या प्रकरणातील मूळ तक्रारदार अंजली दमानिया यांनीही विशेष न्यायालयात अर्ज केला होता. या प्रकरणी आपली बाजू ऐकण्याची मागणी त्यांनी केली होती. मात्र योग्य त्या कायदेशीर प्रक्रियेचा अवलंब करण्याची सूचना न्यायालयाने त्यांना केली.

मुंबई सत्र न्यायालयाने दिलेल्या या निर्णयानंतर अंजली दमानिया यांनी ट्विट करत यावर प्रतिक्रिया दिली आहे. अंजली दमानिया यांनी ट्विट करत हायकोर्टात दाद मागणार असल्याचं म्हटलं आहे.

छगन भुजबळ, पंकज भुजबळ आणि समीर भुजबळ यांना Session’s court कडून महाराष्ट्र सदन केस मधून डिस्चार्ज मिळाला आहे. ह्या डिस्चार्ज ला मी हाय कोर्टात चॅलेंज करणार आहे

— Mrs Anjali Damania (@anjali_damania) September 9, 2021

छगन भुजबळ हे सार्वजनिक बांधकाम मंत्री असताना जारी करण्यात आलेल्या विविध कंत्राटातून भुजबळ कुटुंबीयांच्या कंपन्यांना मोठ्या प्रमाणात रोख रक्कम लाचेच्या स्वरुपाचा मिळाल्याचा आरोप होता. महाराष्ट्र सदन प्रकरणात सर्वप्रथम एसीबीने गुन्हा दाखल केला होता. नंतर हे प्रकरण ईडीने हाती घेत तपास केला. त्यादरम्यान भुजबळांची तब्बल 200 कोटींची मालमत्ता जप्त केली. या प्रकरणात छगन भुजबळ याची कारागृहात देखील रवानगी करण्यात आली होती. आता सत्र न्यायालयाने छगन भुजबळ यांना दिलासा दिला असला, तरी अंजली दमानिया आता वरच्या कोर्टात धाव घेणार आहेत.

The post महाराष्ट्र सदन घोटाळा प्रकरणी छगन भुजबळ यांची निर्दोष मुक्तता, अंजली दमानिया वरच्या कोर्टात दाद मागणार appeared first on थोडक्यात घडामोडी.

मुंबई : राज्यातील अनाथांना स्वतंत्र शिधापत्रिका मिळावी अशी मागणी अनेक वर्ष केली जात होती. याबाबत अन्न व नागरी पुरवठा व ग्राहक संरक्षण मंत्री छगन भुजबळ यांनी अनाथांना वयाच्या २८ वर्षापर्यंत तात्पुरती पिवळी (बीपीएल) शिधापत्रिका वितरण करण्याबाबतचा निर्णय प्राधान्य कुटुंब योजनेंतर्गत घेतला आहे.

राज्यातील २८ वर्षापर्यंतच्या अनाथांना बीपीएल शिधापत्रिकेबरोबर त्याचे लाभ मिळतील व २८ वर्षावरील अनाथांना उत्पन्नाप्रमाणे शिधापत्रिका मिळेल व त्याप्रमाणे त्याचे लाभ देण्यात येतील. या निर्णयामुळे राज्यातील अनाथ मुलांना मोठा आधार होणार असल्याचे छगन भुजबळ यांनी सांगितले. कोरोनाकाळात अनेक मुलांच्या पालकांचे मृत्यू झाल्यामुळे ते अनाथ झाले आहेत, अशा मुलांना या निर्णयाचा मोठा फायदा होणार असल्याचे त्यांनी सांगितले.

राज्य सरकारने हा निर्णय घेतल्यानंतर शिधापत्रिका मिळवताना कागदपत्रांचा अडथळा निर्माण होऊ नये यासाठी अनाथ असल्याचा पुरावा म्हणून महिला व बालविकास विभागाने वितरित केलेले अनाथ प्रमाणपत्र किंवा आई व वडील यांचे मृत्यू प्रमाणपत्र यापैकी कोणताही एक पुरावा ग्राह्य धरण्यात येणार असल्याचे माहिती देखील भुजबळ यांनी दिली. अनाथांना सामाजिक, शैक्षणिक आणि आर्थिकदृष्ट्या सक्षम बनवण्यासाठी शासन कटीबद्ध असल्याची भावना देखील त्यांनी व्यक्त केली.

The post राज्यातील अनाथांना मिळणार बीपीएल शिधापत्रिका appeared first on थोडक्यात घडामोडी.