पुणे : दारू पिण्यास पैसे न दिल्याने पतीने पत्नीवर कुऱ्हाडीने वार केल्याची धक्कादायक घटना समोर आली आहे. तळजाई वसाहतीत हा प्रकार घडला असून या प्रकरणी सहकारनगर पोलिसांनी गुन्हा दाखल करीत पतीला अटक केली आहे. पूनम दत्ता अडागळे (वय ३२, रा. खंडाळे चौक, तळजाई वसाहत, पद्मावती) असे गंभीर जखमी झालेल्या महिलेचे नाव आहे. सहकारनगर पोलीस ठाण्यात दिलेल्या फिर्यादीनुसार आरोपी दत्ता राजाराम अडागळे (वय ३८) याला अटक करण्यात आली आहे.

पोलिसांनी दिलेल्या माहितीनुसार, आरोपी दत्ता याचा पूनमशी २०१५ साली विवाह झाला होता. तो काहीही कामधंदा करीत नाही. त्याला दारू पिण्याचे व्यसन आहे. त्यांना सात वर्षांचा मुलगा आहे. कुटुंबाच्या उदरनिर्वाहासाठी पूनम घरकाम करते. सोमवारी (३१ मार्च) रात्री आठच्या सुमारास आरोपी दत्ता हा दारू पिऊन घरी आला. त्यानंतर त्याने दारू पिण्यासाठी पत्नी पूनमकडे अजून पैसे मागितले. मात्र तिने पैसे देण्यास नकार दिला. त्यानंतर आरोपी दत्ता याने रागाच्या भरात पूनमवर कुऱ्हाडीने हल्ला केला. पूनमने आरडाओरडा केला मात्र, त्यांच्या डोक्यात कुऱ्हाडीचा घाव बसला आणि त्यात पूनमच्या डोक्याला गंभीर दुखापत झाली. तिच्यावर रुग्णालयात उपचार सुरू आहेत. दरम्यान, पोलिसांनी आरोपी दत्ता याला अटक केली आहे. पोलीस उपनिरीक्षक रेखा साळुंके तपास करत आहेत.

The post दारू पिण्यास पैसे न दिल्याने पत्नीवर कुऱ्हाडीने वार, आरोपी पतीला अटक appeared first on थोडक्यात घडामोडी.

पुणे : किरकोळ वादातून १५ वर्षीय भाच्याला त्याच्या मामाने चाकूने भोसकून ठार मारले. शुक्रवारी रात्री सिंहगड रस्त्यावरील नऱ्हे भागात शुक्रवारी रात्री ही घटना घडली. त्यानंतर पसार झालेल्या मामाला सिंहगड पोलिसांनी अटक केली.

गजानन गजकोश (वय १५, रा. धारावी, कोळीवाडा, मुंबई) असे खून झालेल्या मुलाचे नाव आहे. याप्रकरणी मेघनाथ अशोक तपासे (वय ४१, रा. मानाजीनगर, नऱ्हे) याला अटक करण्यात आली. याबाबत आरोपी मेघनाथचा मेहुणा मंगेश दत्तात्रय ओव्हाळ (वय ३१, रा. कृष्णाईनगर, मानाजीनगर गणपती मंदिराजवळ, नऱ्हे) यांनी सिंहगड रस्ता पोलीस ठाण्यात फिर्याद दिली आहे.

मिळालेल्या माहितीनुसार, गजानन हा मामा मेघनाथ याच्याकडे राहण्यासाठी आला होता. शुक्रवारी रात्री त्याचा मामाच्या मुलाशी वाद झाला. त्यानंतर रागाच्या भरात मेघनाथने भाचा गजाननला पट्ट्याने बेदम मारहाण केली. त्यानंतर चाकूने त्याच्या छातीवर वार केला. चाकूने भाेसकल्याने त्याचा मोठ्या प्रमाणावर रक्तस्त्राव झाला. गंभीर जखमी झालेल्या गजाननला तातडीने रुग्णालयात दाखल करण्यात आले. मात्र, उपचारांपूर्वीच त्याचा मृत्यू झाला. या घटनेची माहिती मिळताच परिमंडळ तीनचे पोलीस उपायुक्त संभाजी कदम यांनी घटनास्थळी भेट दिली.

रात्री उशिरा आरोपी मेधनाथला अटक करण्यात आली. प्राथमिक तपासात असे दिसून आले की, आरोपीने किरकोळ वादातून त्याच्या भाच्याचा चाकूने वार करून खून केला. वरिष्ठ पोलिस निरीक्षक दिलीप दाईंगडे यांच्या मार्गदर्शनाखाली तपास सुरू आहे.

The post पुणे : मामाने भाच्याला चाकूने भोसकून ठार मारले, किरकोळ वादातून भयंकर कृत्य appeared first on थोडक्यात घडामोडी.

पुणे : पुण्यात घरगुती छळाचा एक धक्कादायक प्रकार समोर आला आहे. २५ वर्षीय विवाहित महिलेने तिचा पती आणि त्याच्या मित्राविरुद्ध छेडछाड आणि मानसिक छळ केल्याचा आरोप केला आहे. याप्रकरणी पोलिस महिलेचा ३० वर्षीय पती आणि त्याचा ५० वर्षीय मित्र यांची चौकशी करत आहेत.

मिळालेल्या माहितीनुसार, महिलेचा पती बराच काळापासून तिचे शारीरिक शोषण करत होता. एकदा त्याने त्याच्या मित्राला घरी आणले आणि त्या मित्राला पत्नीशी लैंगिक संबंध ठेवण्यास सांगितले तेव्हा परिस्थिती आणखी बिकट झाली. या धक्कादायक भेटीदरम्यान, मित्राने तिच्या गोपनीयतेचे उल्लंघन करून अनुचित शेरेबाजी केली. महिलेने या गोष्टीला प्रतिकार केला, मात्र भीती आणि दबावामुळे तिने त्यावेळी घटनेची त्वरित तक्रार करणे टाळले.

तथापि, महिलेचा छळ एवढ्यावरच थांबला नाही. आरोपी मित्र तिला अनुचित संदेश पाठवत राहिला आणि फोन करत राहिला आणि सतत तिच्यावर दबाव आणत राहिला. त्याने तिला सांगितले की, “तुझा नवरा तुझ्याशी लैंगिक संबंध ठेवू शकत नाही; तो मला तुझ्या मुलाचा पिता बनवू इच्छितो.” या सततच्या छळाला कंटाळून अखेर महिलेने पोलिसांकडे धाव घेतली. तिच्या तक्रारीच्या आधारे, खडक पोलिसांनी पती आणि त्याच्या मित्राविरुद्ध कायद्याच्या संबंधित कलमांखाली गुन्हा दाखल केला आहे. सहाय्यक पोलीस निरीक्षक तोंडे तपासाचे नेतृत्व करत आहेत. याप्रकरणी आरोपींवर कठोर कारवाई करण्याची अपेक्षा आहे.

The post पुण्यातील धक्कादायक प्रकार! पतीने त्याच्या मित्राला पत्नीशी लैंगिक संबंध ठेवण्यासाठी घरी आणले, आणि… appeared first on थोडक्यात घडामोडी.

उत्तर प्रदेश : दोन वर्षांपूर्वी विवाह झाल्यानंतर देखील पहिल्या प्रियकराच्या संपर्कात राहत असल्यामुळे पतीने विरोध केला, आणि या वादातून पत्नीने त्याला कॉफीतून विष दिल्याची धक्कादायक घटना घडली आहे. ही घटना 25 मार्च 2025 रोजी रात्री उशिरा घडली. रात्री 10.30 वाजता, कार्यालयातून घरी परतलेल्या अनुजने पत्नीकडे कॉफी मागितली होती. पत्नीने त्याला कॉफीतून विष दिले.

अनुज शर्मा (30) आणि पिंकी (28) यांचा विवाह दोन वर्षांपूर्वी फारुकनगर, गाझियाबादमध्ये झाला होता. अनुज मेरठमधील एका खासगी रुग्णालयात रिसेप्शनिस्ट म्हणून काम करत होता. या जोडप्याच्या वैवाहिक जीवनात सतत तणाव होता आणि अनेक वेळा त्यांच्यात मारामारी होणं देखील सामान्य बाब बनली होती. यामुळे पिंकी आपल्या माहेरी राहत होती, आणि पंधरा दिवसांपूर्वीच ती सासरच्या घरी परतली होती.

25 मार्च रोजी रात्री 10.30 वाजता अनुज आपल्या कार्यालयातून घरी परतला. घरी पोहोचल्यावर त्याने पत्नीकडे कॉफी मागितली होती. पिंकीने दिलेली कॉफी प्यायल्यानंतर अनुजला अचानक उलट्या होऊ लागल्या. कुटुंबीयांनी त्याला तात्काळ खतौली येथील खासगी रुग्णालयात दाखल केले, परंतु, त्याची स्थिती गंभीर असल्याने रुग्णालयाने त्याला मेरठमध्ये रेफर केले.

अनुजच्या मोठ्या बहिणीने मीनाक्षीने सांगितले की, पिंकीचे तिच्या मामाच्या मुलीच्या मुलाशी अफेअर होते, पण घरच्यांच्या दबावाखाली तिने अनुजशी विवाह केला. विवाहानंतर देखील ती आपल्या प्रियकराशी गुपचूप संवाद साधत होती, हे अनुजला समजले आणि यावरून अनुज व पिंकीमध्ये वाद झाले. अनुजने पिंकीचा मोबाईल तपासला आणि त्यात अनेक आक्षेपार्ह संदेश आढळले. यानंतर अनुजने पिंकीला तिच्या प्रियकराशी बोलण्यास मनाई केली होती. या कारणामुळे दोघांमध्ये वाद वाढला आणि पिंकी माहेरी गेली. अनुजने याबाबत पिंकीच्या घरच्यांकडे तक्रार केली, मात्र पिंकीच्या घरच्यांनी तिला काहीच सांगितले नाही. महिला आयोगाच्या हस्तक्षेपानंतर पिंकीने सांगितले की, ती एकत्र राहण्यास तयार आहे. त्यानंतर पिंकी 15 दिवसांपूर्वी सासरच्या घरी परतली, परंतु परत येताच तीने सासूला धमकी दिली की ती काही खास कामासाठी परतली आहे. सासूने विचारले की, काय खास काम आहे? यावर पिंकीने उत्तर दिले की, “ते वेळ आल्यावर कळेल.” यावरून पिंकीच्या वागणुकीविषयी सासू देखील गोंधळात पडली.

अखेर, मंगळवारी रात्री पिंकीने कॉफीमध्ये विष मिसळून अनुजला प्यायला दिले. अनुजवर मेरठमध्ये उपचार सुरू आहेत. आतापर्यंत पिंकीचे कुटुंबीय अनुजला भेटायलाही आले नाहीत. त्याच्या प्रकृतीची विचारणा देखील केली नाही.

पोलिसांनी या प्रकरणाची गंभीर दखल घेत पत्नी पिंकीविरुद्ध गुन्हा दाखल केला आहे. पोलिसांनी सांगितले की, 25 मार्च रोजी पत्नीने पतीला विष दिल्याची माहिती मिळाली आहे. पतीला रुग्णालयात दाखल करण्यात आले आहे आणि त्याची स्थिती सध्या गंभीर आहे. कुटुंबीयांच्या तक्रारीवरून पत्नीविरुद्ध गुन्हा दाखल करण्यात आला आहे. चौकशीनंतर पुढील कारवाई केली जाईल.

The post धक्कादायक! प्रियकराशी बोलण्यास पतीचा नकार, पत्नीने थेट पतीला कॉफीतून दिले विष… appeared first on थोडक्यात घडामोडी.

हरियाणा : हरियाणाच्या रोहतक जिल्ह्यातील मांडोठी गावात एक धक्कादायक घटना घडली आहे, ज्यामध्ये एका योग शिक्षकाला प्रेमसंबंधांच्या कारणातून त्याचा जीव गमवावा लागला. जगदीप झझ्जर नावाच्या योग शिक्षकाचे डिसेंबर महिन्यात अपहरण झाले होते. तीन महिने त्याचा शोध घेतल्यानंतर अखेर, २४ मार्च २०२५ रोजी, पोलिसांनी चरखी दादरी गावाजवळ सात फूट खोल खड्ड्यात त्याचा मृतदेह सापडला.

मिळालेल्या माहितीनुसार, जगदीप झझ्जर रोहतकच्या मांडोठी गावचा रहिवासी होता, तो बाबा मस्तनाथ विद्यापीठात योग शिक्षक म्हणून कार्यरत होता. त्याचे अपहरण २४ डिसेंबर २०२४ रोजी करण्यात आले, त्यानंतर १० दिवसांनी त्याच्या अपहरणाची तक्रार पोलिसांकडे नोंदवण्यात आली होती. पोलिसांनी त्याचा शोध सुरू केला, परंतु तो सापडत नव्हता. तीन महिन्यांनंतर २४ मार्च २०२५ रोजी, पोलिसांना त्याचा मृतदेह चरखी दादरी गावाजवळ सापडला. आरोपींनी त्याचे हात-पाय बांधून आणि तोंडावर पट्टी लावून त्याला जिवंत गाडलं होतं.

हत्येचे कारण
पोलीस तपासानुसार, जगदीपचे अपहरण आणि हत्या प्रेमसंबंधाच्या कारणातून झाली. जगदीप ज्या ठिकाणी भाडे तत्त्वावर राहत होता, तिथे एका महिलेशी त्याचे प्रेमसंबंध जुळले होते. या महिलेच्या पतीला या संबंधांबद्दल समजल्यानंतर त्याने जगदीपला मारहाण केली आणि त्याच्या हत्येची योजना आखली. आरोपींनी बोअरवेलसाठी खड्डा खोदण्याचे कारण सांगत सात फूट खोल खड्डा खणला आणि त्याच खड्ड्यात त्यांनी जगदीपला जिवंत गाडले.

दोन आरोपींना अटक
या प्रकरणात पोलिसांनी हरीदप आणि धर्मपाल नावाच्या दोन आरोपींना अटक केली आहे. या दोघांचा आणि इतर काही साथीदारांचा सहभाग असल्याचा संशय आहे. पोलिसांनी फोन कॉल्सच्या तपासाद्वारे आरोपींना पकडले आणि तपास सुरू केला. पोलिस अधिकारी कुलदीप सिंह यांनी सांगितले की इतर दोन आरोपींना लवकरच अटक करण्यात येईल. शवविच्छेदन प्रक्रियेदरम्यान, मृतदेहाची ओळख निश्चित केली गेली आहे.

जगदीपच्या मृत्यूमुळे रोहतक परिसरात मोठी खळबळ उडाली आहे. या घटनेने नागरिकांमध्ये भीतीचे वातावरण निर्माण झाले आहे. पोलिसांकडून या प्रकरणाचा तपास सुरू असून, आरोपींना कठोर शिक्षा देण्याचा निर्धार व्यक्त केला आहे.

The post प्रेम प्रकरणातून योग शिक्षकाची हत्या, सात फूट खोल खड्ड्यात जिवंत गाडलं… appeared first on थोडक्यात घडामोडी.

महिलांच्या जीविताचे व स्वातंत्र्याचे संरक्षण व्हावे, हा व्यापक हेतू डोळ्यासमोर ठेवून महिलांनी कौटुंबिक अत्याचाराला बळी पडू नये, समाजामध्ये कौटुंबिक हिंसाचार घडू नये म्हणून केंद्र शासनाने कौटुंबिक हिंसाचारापासून महिलांचे संरक्षण कायदा 2005 केला आहे. या कायद्याच्या माध्यमातून महिलांच्या जीवित, स्वातंत्र्याचे संरक्षण होण्यासाठी कायद्याचे कवच मिळाले आहे.

या कायद्याबाबत थोडक्यात….

कौटुंबिक हिंसाचारापासून महिलांचे संरक्षण अधिनियम, २००५ अंतर्गत न्यायदंडाधिकारी हे पीडित महिलेस त्रास देणारे पती किंवा इतर नातेवाईक, Live in Relationship या तत्त्वानुसार एकत्र राहणारा पुरुष साथीदार अथवा त्याचे नातेवाईक त्यांचेकडून शारीरिक, लैंगिक, आर्थिक आणि तोंडी किंवा भावनिक अत्याचाराने पीडित महिलांना निवासाच्या अधिकारासह तिच्या सुरक्षिततेसाठी इतर आदेश काढून त्याद्वारे महिलेचे सांविधानिक अधिकार सुरक्षित करू शकतात. देशभरात दि. २६ ऑक्टोबर २००६ पासून हा कायदा लागू करण्यात आला आहे.

कायद्याचा उद्देश :
महिलांना कौटुंबिक हिंसाचारापासून संरक्षण देणे, महिलांना घरात सुरक्षितता लाभावी व त्यांना बेघर केले जावू नये. महिलेचा घरात राहण्याचा हक्क अबाधित रहावा. महिलांचे महत्त्व कायमस्वरुपी राहण्यासाठी कठोर कायदेशीर उपाय योजना करणे, महिलांच्या अधिकारांची कडक अंमलबजावणी होणे.

कौटुंबिक हिंसाचार म्हणजे :
शारीरिक, शाब्दिक, लैंगिक, मानसिक किंवा आर्थिक छळ, हुंडा किंवा मालमत्ता देण्यासाठी महिलेला अपमानित करणे, तिला शिवीगाळ करणे, विशेषतः अपत्य नसल्यामुळे तिला हिणवणे किंवा धमकावणे, त्रास देणे, दुखापत करणे, जखमी करणे किंवा पीडित व्यक्तिचा जीव धोक्यात आणण्यास भाग पाडणे किंवा तिच्या कोणत्याही नातेवाईकाकडे हुंड्याची मागणी करणे. या सर्व गोष्टीचा दुष्परिणाम पीडित व्यक्ती अथवा तिच्या नातेवाईकावर होणे तसेच आर्थिक छळ करणे म्हणजेच महिलेचे स्वतःचे उत्पन्न, स्त्रीधन, मालमत्ता किंवा इतर आर्थिक व्यवहार किंवा तिच्या हक्काच्या कोणत्याही मालमत्तेपासून तिला वंचित करणे, घराबाहेर काढणे.

कौटुंबिक हिंसाचारात शारीरिक छळ, लैंगिक अत्याचार, तोंडी आणि भावनिक अत्याचार आणि आर्थिक अत्याचार अशा प्रकारचे अत्याचार समाविष्ट आहेत. यामध्ये पीडितेचा विविध प्रकारे शारीरिक छळ, जबरदस्तीने व अनैसर्गिक पद्धतीने लैंगिक अत्याचार, पीडितेबद्दल अपशब्द, संशय किंवा तोंडी अपमान, अन्य प्रकारची जबरदस्ती किंवा एखाद्या कृतीला मज्जाव तसेच आर्थिक मागणी, तिच्या गरजा पूर्ण न करणे तसेच तिचे हक्क नाकारणे आदि बाबींचा समावेश होतो.

तक्रार कोण दाखल करु शकते :
१) १८ वर्षांखालील मुलगा किंवा मुलगी २) १८ वर्षांवरील विवाहित मुलगी ३) विवाहित महिला आपल्या पतीसह एकत्र राहणाऱ्या सदस्यावर तक्रार करु शकते ३) मयत झालेल्या पतीची पत्नी आपल्या पतीच्या नातेवाईकांविरोधात तक्रार करु शकते ४) घटस्फोटीत महिला या कायद्याच्या कक्षेत येते ५) सासू सुनेच्या विरोधात तक्रार करु शकते ६) लग्नाशिवाय एकत्र राहणारी महिला आपल्या जोडीदाराविरोधात तक्रार करु शकते ७) हिंसाग्रस्त स्त्रीचे नातेवाईक, शेजारी, हितचिंतक तिच्या वतीने अर्ज करु शकतात ८) हिंसाग्रस्त स्त्री साध्या कागदावर लिखित स्वरुपात पत्र रुपाने, दूरध्वनी करुन किंवा प्रत्यक्ष जाऊन मदत मागू शकतात ९) कायद्याखाली फक्त स्त्रियाच तक्रार दाखल करु शकतात तसेच १८ वर्षाखालील मुले १०) राज्य शासनाने नेमलेल्या संरक्षण अधिकाऱ्याकडे किंवा या कायद्याच्या अंतर्गत स्वतंत्र नोंदणी झालेल्या सेवादायी संस्था, मॅजिस्ट्रेट वा पोलीस अधिकारी यापैकी कोणाकडेही अर्ज करता येतो.

या कायद्याखाली कोणत्या गोष्टी मिळतात :
हिंसा करणाऱ्या व्यक्तिला ताबडतोब हिंसा थांबवण्याचा आदेश दिला जातो. हिंसा करणाऱ्या व्यक्तिला हिंसाग्रस्त स्त्रीच्या कामाच्या जागी किंवा तिच्या मुलांच्या शाळेत प्रवेश करण्यास बंदी घालू शकतात. हिंसा करणाऱ्या व्यक्तिला दोघांच्याही सामाईक अथवा स्वतंत्र संपत्ती, स्त्रीधन, बँक अकाऊंटस वापरण्याची बंदी केली जाते. हिंसाग्रस्त स्त्री मात्र हे खाते वापरु शकते. एकत्रित निवासात त्रास देणाऱ्या व्यक्तिला राहण्यास मज्जाव किंवा हिंसाग्रस्त स्त्री राहत असलेल्या भागात प्रवेशास बंदी. हिंसा करणाऱ्या व्यक्तिला त्या स्त्रीची स्वतंत्र राहण्याची सोय करण्याचा आदेश. स्त्री राहत असलेले घर विकणे अथवा तेथे राहण्यापासून तिला परावृत्त करण्यास बंदी. हिंसाग्रस्त स्त्रीला खर्चासाठी पैसे, झालेल्या नुकसानीसाठी दवाखाना व औषधोपचारासाठी पैसे संपत्ती हिरावून घेतली असेल तर त्याची भरपाई, तिच्यासाठी व मुलांसाठी पोटगी इ. मिळू शकते. मुलांचा ताबा मिळतो, गरज वाटल्यास मुलांना भेटण्याची परवानगी पुरुषाला नाकारली जाते. हिंसा करणाऱ्याच्या जवळची शस्त्रे काढून घेतली जातात. या कायद्याखाली पीडित महिलेला आवश्यक असल्यास तिला मोफत विधी सेवा, वैद्यकीयसेवा, निवासाची सोय यासारख्या सेवा मोफत मिळतात.

कोणत्या न्यायालयात केस करता येते :
मा. प्रथम वर्ग न्यायदंडाधिकारी अथवा मेट्रोपॉलिटन मॅजिस्ट्रेटच्या कोर्टात दाद मागता येते. तक्रार करणारी व्यक्ती जिथे कायमचे अथवा तात्पुरते वास्तव्यास असेल त्या भागातील न्यायालयाकडे किंवा प्रतिवादी जिथे काम करतो वा राहतो अथवा ज्या भागात हिंसा घडली आहे तो विभाग न्यायालयाच्या अधिकाराखाली असला पाहीजे.

केस करण्याची पध्दती :
हिंसाग्रस्त स्त्री अथवा संरक्षण अधिकारी किंवा इतर व्यक्ती हिंसाग्रस्त स्त्रीच्या वतीने एका ठराविक फॉर्मवर माहिती भरुन कोर्टात केस दाखल करु शकतात. केस दाखल झाल्याची पावती मिळते आणि तीन दिवसाच्या अवधीत त्या केसची प्रथम सुनावणीची तारीख मिळते. संरक्षण अधिकाऱ्याकडून हिंसेसंदर्भातील अहवाल कोर्ट मागवून घेते, जर गरज असेल अथवा दोघांपैकी एकाची जरी इच्छा असेल तर केस इन कॅमेरा चालू शकते. अत्यंत तातडीची गरज असेल तेव्हा न्यायाधीश एकतर्फी निकाल देऊ शकतात. जेव्हा एखाद्या स्त्रीला जीवघेणी मारहाण किंवा तत्सम इजा झाली असेल तर गरज म्हणून तिच्या संरक्षणासाठी असा निकाल दिला जावू शकतो. अत्यंत महत्वाचा मुद्दा म्हणजे घटस्फोटाची अथवा ४९८-अ ची अथवा इतर केस कोणत्याही दुसऱ्या कोर्टात चालू असली तरी तातडीच्या संरक्षणासाठी या कायद्याखाली संरक्षण मिळू शकते तसेच या कायद्याखाली संरक्षण मागितल्यावर दुसऱ्या फौजदारी कायद्याची मदत स्त्री घेवू शकते. संपूर्ण केस ६० दिवसाच्या आत पूर्ण करुन त्याचा निकाल दिला जातो.

The post महिलांच्या जीवित, स्वातंत्र्याच्या संरक्षणासाठी कायद्याचे कवच, या कायद्याबाबत थोडक्यात… appeared first on थोडक्यात घडामोडी.