चेन्नई सुपरकिंग्स संघाला धक्का, ड्वेन ब्राव्हो दुखापतीमुळे खेळू शकणार नाही पुढील काही मॅच

चेन्नई सुपरकिंग्स संघाचा अष्टपैलू खेळाडू ड्वेन ब्राव्हो याला दुखापत झाली आहे. त्यामुळे आयपीएलच्या पुढील मॅच ब्राव्हो खेळणार नाही, अशी शक्यता आहे. दिल्ली कॅपिटल्स विरुद्धच्या मॅचमध्ये ब्राव्होच्या कंबरेजवळच्या पायाला नियंत्रित करणाऱ्या स्नायूंना दुखापत झाली. डॉक्टरांनी त्याची तपासणी केली. दुखापतीचे स्वरुप लक्षात येताच ब्राव्होला विश्रांती घेऊन उपचार घेण्याचा सल्ला देण्यात आला.

ब्राव्होला स्नायूंच्या दुखापतीमुळे खेळण्यासाठी वेगाने पायाच्या हालचाली करताना प्रचंड त्रास होत आहे. दिल्ली कॅपिटल्स विरुद्धच्या मॅचमध्ये तीन ओव्हर टाकणाऱ्या ब्राव्होला दुखापतीचा त्रास होऊ लागल्यामुळे त्याला मैदानाबाहेर जावे लागले होते. नंतर मॅच संपेपर्यंत तो परतला नाही. दिल्ली कॅपिटल्सने पाच विकेट राखून मॅच जिंकली.

दुखापतीतून सावरण्यासाठी वेळ लागणार असल्यामुळे ड्वेन ब्राव्हो आयपीएलमध्ये किमान पुढील काही मॅच खेळणार नाही, असे चेन्नई सुपरकिंग्स संघाचे मुख्य कोच स्टीफन फ्लेमिंग यांनी सांगितले. तसेच वैद्यकीय पथक ब्राव्होच्या दुखापतीवर उपचार करत आहे, अशी माहिती त्यांनी दिली.