शरद पवारांच्या भाषणाची पुनरावृत्ती अमेरिकेतही, भर पावसात जो बायडन यांचं भाषण

अमेरिकेच्या राष्ट्राध्यक्षपदाच्या प्रत्यक्ष मतदानाला चार दिवस राहिले असताना अमेरिकेत सध्या जो बायडन यांच्या ‘सातारा टाइप’ सभेची जोरदार चर्चा सुरू आहे. डेमोक्रॅटीक पक्षाचे उमेदवार जो बायडन फ्लोरिडा येथील सभेत भाषण करत असताना अचानक पाऊस आला. मात्र, बायडन यांनी आपले भाषण सुरूच ठेवले.

फ्लोरिडामधील सभेत भर पावसात भाषण करणाऱ्या ७७ वर्षांच्या जो बायडन यांनी अमेरिकन नागरिकांची मने जिंकली आहेत. सोशल मीडियावर याची जोरदार चर्चा सुरू आहे. अमेरिकेत सध्या पोस्टल आणि ई-मेलद्वारे मतदान सुरू आहे. तर, दुसरीकडे तीन नोव्हेंबर रोजी प्रत्यक्ष मतदान होणार आहे. यंदाची निवडणूक अटीतटीची होणार असल्याचा अंदाज वर्तवण्यात आला आहे. या निवडणुकीत फ्लोरिडा हे महत्त्वाचे राज्य ठरणार आहे. त्यामुळे दोन्ही उमेदवारांनी जोर लावला आहे.

बायडन सभेत भाषण करत असताना पाऊस कोसळण्यास सुरुवात झाली. मात्र, बायडन यांनी सभेत भाषण सुरूच ठेवले. त्यांची ही सभा ‘रॅली ड्राइव्ह इन’ होती. या सभेला हजर असणारे कारमध्ये बसून भाषण ऐकत होते. करोना संसर्गाच्या पार्श्वभूमीवर ही खबरदारी घेण्यात आली होती. काही नेटकऱ्यांना अमेरिकेचे माजी राष्ट्राध्यक्ष बराक ओबामा यांच्या १२ वर्षांपूर्वीच्या भाषणाची आठवण झाली. त्यांनी त्याची तुलना करताना बायडन त्या विजयाची पुनरावृत्ती करतील असा विश्वासही व्यक्त केला आहे. ओबामा राष्ट्राध्यक्ष असताना बायडन उपराष्ट्रपती होते.

वर्षभरापूर्वी सातारा येथील सभेत राष्ट्रवादी काँग्रेसचे अध्यक्ष शरद पवार यांनीदेखील भर पावसात सभा घेतली होती. त्याचा राज्यातील निवडणूक प्रचारावर मोठा प्रभाव पडला होता.