कोरोनापेक्षाही घातक व्हायरसचे संशयित रुग्ण आढळले, WHO कडूनही Alert

नवी दिल्ली :  देशात कोरोना महामारीचे प्रकरण काही प्रमाणात कमी झाले आहे. मात्र, आता एका नवीन व्हायरसने दहशत निर्माण केली आहे. हा नवीन व्हायरस कोरोना पेक्षाही घातक असल्याचे सांगितले जात आहे. या व्हायरसपासून सावध राहा असा इशारा WHO ने दिला आहे. विशेष बाब म्हणजे, नव्याने आढळून आलेल्या मारबर्ग या व्हायरसची याआधीही काही प्रकरणं समोर आली होती. WHO च्या माहितीनुसार, 1967 मध्येही या व्हायरसची सर्वाधिक प्रकरणं आढळली होती. तेव्हापासून दक्षिण आणि पूर्व आफ्रिकेत या व्हायरसचा बऱ्याचदा उद्रेक झाला आहे.

मारबर्ग हा व्हायरस इबोला व्हायरसपेक्षाही कित्येक पटीने धोकादायक आहे. किती तरी वेगाने पसरून तो लोकांना आपल्या विळख्यात घेतो. जर कुणी या व्हायरसच्या विळख्यात सापडलं तर त्याचा मृत्यू निश्चित आहे, असंही सांगितलं जातं. यामुळे होणारा मृत्यूदर हा 24 ते 88 टक्के आहे. मारबर्ग व्हायरसवर कोणतंही अँटिव्हायरल औषध किंवा लस नाही.

दरम्यान, ICMR चे माजी महासंचालक एन.के. गांगुली यांनी सांगितलं की, मारबर्ग हा व्हायरस एका व्यक्तीमार्फत दुसऱ्यापर्यंत पसरू शकतो. एकमेकांच्या संपर्कात आल्याने किंवा स्पर्श झाल्याने या व्हायरसचा प्रसार होतो. मारबर्ग हा इबोला व्हायरसशी संबधित व्हायरस आहे. या व्हायरसची लक्षणे फ्लूसारखी असतात. सध्यातरी या व्हायरसचे रुग्ण आक्रिकाबाहेरील देशात सापडले नसले, तरी या व्हायरसबाबत लोकांनी सतर्क राहिलं पाहिजे असं तज्ञांचं मत आहे.