हृदयद्रावक! निलांचल एक्स्प्रेसमधील प्रवाशाच्या गळ्यातून लोखंडी रॉड गेली आरपार, जागीच मृत्यू

उत्तर प्रदेश : दिल्लीहून येणाऱ्या निलांचल एक्स्प्रेसमध्ये प्रवास करणाऱ्या सुलतानपूर येथील एका प्रवाशाच्या गळ्यात लोखंडी रॉड आरपार घुसल्याने त्याचा मृत्यू झाला. सोमना आणि डांबर रेल्वे स्थानकादरम्यान ही घटना घडली. अपघातानंतर ट्रेनमध्ये घबराट पसरली होती. प्रवाशाचा मृतदेह रेल्वे स्थानकावर उतरवण्यात आला. हरिकेश संतराम दुबे रा. सुलतानपूर, असे प्रवाशाचे नाव आहे.

अलिगडजवळील डाबर आणि सोमना रेल्वे स्थानकादरम्यान सकाळी ८ वाजण्याच्या सुमारास निलांचल एक्स्प्रेस वेगात पोहोचली, तेव्हा भरधाव वेगाने बाणाप्रमाणे उडणाऱ्या सात फूट रॉडने डब्याची काच फोडली आणि त्यात बसलेल्या एका प्रवाशाच्या मानेतून आरपार गेली. अपघात एवढा भीषण होता की, बोगी रक्ताने लाल झाली. दरम्यान, काही जणांनी चेन खेचून ट्रेन थांबवली. माहिती मिळताच जीआरपी आणि आरपीएफने मृतदेह ट्रेनमधून बाहेर काढला आणि पोस्टमॉर्टमसाठी पाठवला.

पोलिसांनी याप्रकरणी हत्येचा गुन्हा दाखल केला नाही. रेल्वे स्तरावरून घटनास्थळी काम सुरू असल्याचे सांगण्यात येत आहे. मिळालेल्या माहितीनुसार, ट्रॅकवर काम करणारा एक मजूर रॉड तेथेच सोडून निघून गेला, ज्यामुळे हा अपघात झाला. पोलिसांकडून मजुरांची माहिती घेतली जात आहे.