रस्त्यावर चुकीच्या पद्धतीने वाहन पार्क करणं पडणार महागात, नितीन गडकरी थेट कायद्याचं बोलले…

नवी दिल्ली : केंद्रीय मंत्री नितीन गडकरी म्हणाले की, मी असा कायदा आणणार आहे की रस्त्यावर उभ्या केलेल्या वाहनाला 1000 रुपये दंड आकारला जाईल. दुसरीकडे, चुकीच्या पद्धतीने वाहन पार्क करणाऱ्या व्यक्तीचे छायाचित्र काढून पाठवणाऱ्याला 500 रुपये दिले जातील. दिल्लीतील एका कार्यक्रमाला संबोधित करताना नितीन गडकरी म्हणाले की, रस्त्यावर चुकीच्या पद्धतीने पार्क केलेल्या वाहनांच्या प्रवृत्तीला आळा घालण्यासाठी कायदा आणण्याचा विचार करत आहोत.

जर एखाद्या व्यक्तीने रस्त्यावर चुकीच्या पद्धतीने पार्क केलेल्या वाहनाचे छायाचित्र पाठवले तर त्याला 500 रुपयांचे बक्षीस मिळेल. सरकार लवकरच तसा कायदा आणणार आहे. त्याचबरोबर चुकीच्या पद्धतीने पार्किंग करणाऱ्या वाहनधारकाला 1000 रुपये दंड भरावा लागणार आहे. केंद्रीय रस्ते वाहतूक आणि महामार्ग मंत्री नितीन गडकरी यांनी गुरुवारी ही माहिती दिली.

लोक त्यांच्या वाहनांसाठी पार्किंगची जागा बनवत नाहीत, त्याऐवजी ते आपली वाहने रस्त्यावर उभी करतात. नितीन गडकरी पुढे म्हणाले, “माझ्या नागपुरातील स्वयंपाक्याकडेही दोन सेकंड हँड वाहने आहेत. आज-काल चार जणांच्या कुटुंबाकडे सहा गाड्या असतात. असे वाटते की दिल्लीचे लोक नशीबवान आहेत, त्यांची वाहने उभी करण्यासाठी आम्ही रस्ता बनवला आहे, असा टोलाही त्यांनी लगावला.