लाल किल्ला हिंसाचार प्रकरण : दीप सिद्धूसह 8 आरोपींवर दिल्ली पोलिसांकडून बक्षिसांची घोषणा

२६ जानेवारीला झालेल्या लाल किल्ल्यातील हिंसाचारप्रकरणी दीप सिद्धू, जुगराज सिंह, गुरजंत सिंह, गुरजोत सिंह, जगबीर सिंग, बूटा सिंग, सुखदेव सिंग आणि इक्बाल सिंह यांना अटक करण्यासाठी दिल्ली पोलिसांनी बक्षीस जाहीर केले आहे.

पंजाब, हरियाणा आणि उत्तर प्रदेशमधील हजारो शेतकरी सिंघू, टीकरी आणि गाझीपूर सीमेवर तिन्ही कृषी कायदे मागे घेण्याच्या मागणीसाठी आंदोलन करत आहेत. मात्र 26 जानेवारी रोजी प्रजासत्ताक दिनाच्या दिवशी, ट्रॅक्टर आणि मोटारसायकलवर स्वार असलेल्या सुमारे 300 जणांनी लाल किल्ल्याच्या आत उत्पात मांडला होता आणि भीषण परिस्थिती निर्माण केली होती. यामध्ये बरेच पोलिस देखील जखमी झाले होते.

दिल्ली पोलिसांनी आता 26 जानेवारीच्या हिंसाचारात सहभागी असलेल्या दीप सिद्धू, जुगराज सिंह, गुरजोत सिंह आणि गुरजंत सिंग यांना अटक करण्यासाठी प्रत्येकी एक लाख रुपये आणि जगबीर सिंग, बूटासिंग, सुखदेव सिंग आणि इक्बाल सिंग यांना अटक करण्यासाठी प्रत्येकी 5०,००० रुपये रोख पुरस्कार जाहीर केला आहे.