चांद्रयान-३ : विक्रम लँडरचे पुन्हा एकदा सॉफ्ट लँडिंग, हॉप प्रयोग यशस्वीरित्या पूर्ण

बेंगळुरू : विक्रम लँडरने चांद्रयान-३ मोहिमेचे उद्दिष्ट पूर्ण केले आहे. सोमवारी इस्रोने विक्रम लँडरने आपला ‘हॉप प्रयोग’ यशस्वीपणे पूर्ण केल्याचे व्हिडिओ प्रसिद्ध केले आहेत.

इस्रोने सांगितले की, रोव्हर स्लीप मोडमध्ये गेल्यानंतर, कंट्रोल रूमच्या आदेशानुसार, विक्रम लँडरचे इंजिन पुन्हा सुरू करण्यात आले आणि ते 40 सेमी वर उचलण्यात आले, त्यानंतर त्याने त्याच्या ठिकाणापासून 30 – 40 सेमी अंतरावर सुरक्षितपणे पुन्हा एकदा सॉफ्ट लँडिंग केली.

इस्रोचा ‘हॉप प्रयोग’
या यशस्वी ‘हॉप प्रयोगा’मुळे चंद्रावरून नमुने परत आणण्याची आणि भविष्यात मानवी मोहिमा पूर्ण करण्याची शक्यता बळकट झाली आहे. सर्व यंत्रणा व्यवस्थित काम करत असल्याचे इस्रोने म्हटले आहे. या ‘हॉप प्रयोगा’द्वारे, रॅम्प, ChaSTE आणि ILSA पुन्हा सक्रिय करून यशस्वीरित्या चाचणी करण्यात आली आहे.

रोव्हर स्लीप मोडवर 
इस्रोने 3 सप्टेंबर रोजी सांगितले की चांद्रयान-3 चे रोव्हर ‘प्रज्ञान’ चंद्राच्या पृष्ठभागावर 10 दिवसांचे पहिले कार्य पूर्ण केल्यानंतर स्लीप मोडमध्ये गेले आहे.

चंद्राच्या दक्षिण ध्रुवावर आता रात्र झाली आहे आणि अशा परिस्थितीत रोव्हरला काम करणे अशक्य आहे. सध्या चंद्राच्या दक्षिण ध्रुवाचे तापमान उणे २०० अंशांच्या खाली आहे. आता सूर्याची किरणे पुन्हा चंद्राच्या या भागावर पडतील, त्यानंतर ‘प्रज्ञान’ रोव्हर स्लीप मोडवरून वर्क मोडवर जाईल.

23 ऑगस्ट रोजी इस्रोने चंद्राच्या दक्षिण ध्रुवावर विक्रम लँडरचे सॉफ्ट लँडिंग करून विक्रम केला. विक्रम लँडरच्या सॉफ्ट लँडिंगनंतर इस्रोने चंद्राची अनेक रोमांचक छायाचित्रे आणि व्हिडिओ शेअर केले आहेत.