राम मंदिर भूमिपूजनाच्या धर्तीवर ओवैसींच्या एका ओळीच्या ट्विटनं खळबळ

राम मंदिराच्या भूमिपूजनाचा ऐतिहासिक दिवस आज अखेर उजाडला आहे. अशातच एमआयएमचे नेते असदुद्दीन ओवैसींच्या एका ओळीच्या ट्विटनं खळबळ माजली आहे.

राम मंदिर भूमिपूजनाच्या धर्तीवर बोलताना ओवैसी म्हणतात की, बाबरी मशीद तेव्हाही होती, आजही आहे आणि पुढेही राहिल. तसेच बाबरी मशीदचा जुना फोटो टाकताना त्यांनी ‘बाबरी जिंदा है’ (#BabariZindaHai) या हॅशटॅगचाही वापर केला आहे.

धर्मनिरपेक्षता हाच भारतीय संविधानाचा पाया असून मोदींनी भूमीपूजन समारंभात सहभागी होणं हे त्यांच्या संविधानिक शपथेचं उल्लंघन असल्याचं मत ओवैसी यांनी काही दिवसांपूर्वीच व्यक्त केलं होतं. बाबरी ही मशीद असून ती कायम राहणार आहे. ही माझी श्रद्धा असून त्यापासून मी किंवा इतर कुणीही पळ काढू शकत नाही. मशीदीत 1949 मध्ये गुप्तपणे मूर्ती ठेवण्यात आली होती. यानंतर 1992 मध्ये मशीद पाडण्याची घटना घडली आहे. आम्ही नव्या पिढीला सांगतच राहू की, आपली मशीद पाडण्यात आलीय, असंही औवैसींनी यावेळी सांगितलं होतं.

मात्र भूमिपूजनाला काहीच तास शिल्लक असताना ओवैसींनी केलेल्या ट्विटनं वातावरण चांगलंच तापलं आहे.