फुरसुंगी गावातील कॅनॉलमध्ये आढळले दोन मृतदेह

पुणे : फुरसुंगी गावातील कॅनॉलमध्ये आज (२५ मे) सकाळी दोन मृतदेह आढळून आले, यातील एक मृतदेह महिलेचा आणि दुसरा पुरुषाचा आहे. अग्निशमन दलाच्या जवानांनी हे दोन्ही मृतदेह बाहेर काढले आहेत.

दरम्यान, हडपसर परिसरातील शिंदेवादी येथे सोमवारी रात्री दहा वाजण्याच्या सुमारास एक महिला कॅनॉलमध्ये पडल्याची वर्दी अग्निशमन दलाला मिळाली होती. त्यानुसार जवानांनी रात्री महिलेचा शोध घेतला होता. मात्र, महिला सापडली नव्हती.

लोणी काळभोर पोलिसांनी अग्निशमन दलाला सकाळी फुरसुंगी येथे कॅनॉलमध्ये एका पुरुषाचा मृतदेह वाहून आल्याची माहिती दिली. अग्निशमन दलाचे जवान त्या ठिकाणी पोहोचले. जवान आणि परिसरातील कार्यकर्ते बच्चूसिंग टाक यांनी पुरुषाचा मृतदेह बाहेर काढला. त्याचवेळी एका महिलेचाही मृतदेह वाहत येत असल्याचे जवानांना दिसले. त्यांनी महिलेचा मृतदेह देखील बाहेर काढला. दोन्ही मृतदेह लोणी काळभोर पोलिसांच्या ताब्यात देण्यात आले असून, पोलिसांकडून पुढील कार्यवाही सुरू असल्याची माहिती अग्निशमन दलाच्या अधिकाऱ्यांनी दिली.

मंगळवारी सकाळी फुरसुंगी येथे महिलेचा मृतदेह सापडल्यानंतर पोलिसांनी शिंदेवाडीच्या घटनेतील महिलेच्या नातेवाईकांना कळवले. त्यांनी येऊन ओळख पटवल्यानंतर हा त्याच महिलेचा मृतदेह असल्याचे स्पष्ट झाले. मात्र, दुसऱ्या मृतदेहाची ओळख अद्याप पटलेली नाही.