अंधश्रद्धेचा कहर! तीन वर्षांच्या चिमुकल्याच्या पोटावर गरम विळ्याचे चटके

अमरावती : भोंदूबाबाने तीन वर्षांच्या चिमुकल्याला उपचाराच्या नावाखाली विळ्याचे चटके दिल्याचा प्रकार अमरावती जिल्ह्यातील चिखलदरा तालुक्यातील खटकाली गावात घडला आहे. या मुलाला ताप आल्यानंतर डॉक्टरांकडे नेण्याऐवजी भोंदूबाबाकडे नेऊन अघोरी उपचार करण्यात आले. या प्रकारामुळे बाळाची प्रकृती गंभीर असून त्याच्यावर जिल्हा रुग्णालयात उपचार सुरु आहेत.

मेळघाटातील खटकाली गावात तीन वर्षाच्या चिमुकल्याला ताप आला त्यामुळे त्याला त्याच्या आई-वडिलांनी धामणगाव गडी इथल्या आरोग्य उपकेंद्रामध्ये दाखल केलं होतं. मात्र, तिथे त्याचा ताप उतरत नसल्याने आई-वडिलांनी त्याला भोंदूबाबाकडे नेलं. यात अंधश्रद्धेतून भोंदूबाबाने उपचाराच्या नावाखाली या मुलाच्या पोटावर गरम विळ्याने चटके दिले. या भयंकर प्रकारानंतर मुलाची प्रकृती बिघडल्यामुळे त्याला जिल्हा ग्रामीण रुग्णालयात दाखल करण्यात आले आहे.

मुलाच्या पोटावर चटके दिल्यानंतर त्याची प्रकृती गंभीर झाली, त्यामुळे त्याला ग्रामीण रुग्णालयात नेले. तिथे आवश्यक ते उपचार करुन बालकाला दुसऱ्या रुग्णालयात दाखल करण्यात आलं आहे. या प्रकरणी मुलाच्या आई-वडिलांचा जबाब घेऊन पुढील कारवाई केली जाईल, अशी माहिती चिखलदरा पोलीस स्थानकातील पोलिसांनी दिली आहे. मात्र, या प्रकरणात अद्याप कोणतीही तक्रार दाखल करण्यात आलेली नाही.