घाटात वळणाचा अंदाज न आल्यामुळे कार संरक्षक कठड्यावरुन खाली गेली, पण…

सातारा : वाईहून पाचगणीला जाणाऱ्या कारला पसरणी घाटात अपघात झाला. परंतु, यावेळी मोठा अनर्थ टळला. घाटातील वळण चालकाच्या लक्षात न आल्यामुळे कार रस्त्याच्या संरक्षक कठड्यावरुन खाली गेली. परंतु, काही फूट अंतरावर गेल्यानंतर कार एका झाडाला अडकल्याने मोठा अनर्थ टळला. नाहीतर ही कार तीन-चारशे फूट खोल दरीत कोसळली असती. या कारसह सर्व प्रवासी सुरक्षित आहेत.

मिळालेल्या माहितीनुसार, कुलीन ठक्कर व त्यांचे कुटुंबीय काही कामानिमित्त वाईला गेले होते. तेथून पसरणी घाटातून पाचगणीला जात असताना मुसळधार पाऊस सुरु होता. त्यामुळे वळणाचा अंदाज न आल्यामुळे त्यांची कार संरक्षक कठड्यावर चढून दरीच्या बाजूला गेली. मात्र ही कार काही फूट अंतरावर असणाऱ्या झाडात अडकल्यामुळे मोठा अपघात टळला. दरम्यान, घटनेची माहिती मिळताच वाई पोलिसांनी तात्काळ पसरणी घाटात धाव घेतली. त्यानंतर क्रेनच्या साह्याने कार बाहेर काढण्यात आली. त्यामुळे कारमधील एक पुरुष व दोन महिलांचे प्राण वाचले. वाई पोलिस ठाण्यात अपघाताची नोंद करण्यात आली आहे.