दुःखद! खेळताना पाण्याने भरलेल्या बादलीत बुडून १ वर्षाच्या चिमुकल्याचा मृत्यू

ठाणे : ठाणे जिल्ह्यातील भिवंडी शहरात अतिशय दुःखद घटना घडली आहे. बाथरूममध्ये पाण्याने भरलेल्या बादलीत बुडून एक वर्षाच्या चिमुकल्याचा मृत्यू झाला. शहरातील देवनगर भागात ही दुर्दैवी घटना घडली.

मिळालेल्या माहितीनुसार, भिवंडीतील देवनगर भागात एक वर्षाच्या चिमुकल्याचा मृत्यू झाला. बाथरूममध्ये पाण्याने भरलेल्या बादलीत बुडून त्याचा मृत्यू झाला. घटना घडली त्यावेळी त्याची आई किचनमध्ये स्वयंपाक करत होती. तर या बाळाची इतर भावंडे टीव्ही बघत बसली होती. हा चिमुकला खेळता खेळता बाथरूममध्ये गेला. तिथे पाणी खेळत असताना बादलीत पडून त्याचा मृत्यू झाला.

दिलकैश अन्सारी असे या चिमुकल्याचे नाव आहे. दिलकैश हा सहा भावंडांमध्ये सर्वात लहान होता. तो आपल्या भावंडांसोबत हॉलमध्ये खेळत होता. त्याची आई शबाना अन्सारी ही स्वयंपाकघरात होती. स्वयंपाक केल्यानंतर ती स्वंयपाकघरातून बाहेर आली, त्यावेळी दिलकैश कुठेही दिसत नव्हता. त्यामुळे शबानाने शोधाशोध सुरू केली. शबाना बाथरूममध्ये गेली तेव्हा तिला दिलकैशचा मृतदेह बादलीत आढळला. पोलिसांना घटनेची माहिती मिळताच पोलिसांनी घटनास्थळी धाव घेतली. शबाना हिच्या फिर्यादीवरून भोईवाडा पोलीस ठाण्यात दिलकैशच्या अकस्मात मृत्यूची नोंद करण्यात आली. दरम्यान, बादलीत पडून चिमुकल्याचा मृत्यू झाल्याच्या घटनेने परिसरात हळहळ व्यक्त करण्यात येत आहे.