शरद पवार यांच्या हस्ते जेजुरी गडावर पुण्यश्लोक अहिल्याबाई होळकर यांच्या पुतळ्याचं अनावरण

जेजुरी : जेजुरी गडावर उभारण्यात आलेल्या पुण्यश्लोक अहिल्याबाई होळकर यांच्या 12 फुटी पुतळ्याचे उद्घाटन आज (१३ फेब्रुवारी) राष्ट्रवादी काँग्रेसचे अध्यक्ष शरद पवार यांच्या हस्ते करण्यात आलं. गडाच्या पायथ्याशी आयोजित कार्यक्रमातून गडावर उभारण्यात आलेल्या पुतळ्याचे पवारांच्या हस्ते उद्घाटन झालं. यावेळी शरद पवार यांच्यासह होळकर घराण्यातील वंशज यशवंतराव होळकर, खासदार छत्रपती संभाजीराजे, दत्तात्रय भरणे, संजय जगताप, रोहित पवार, अशोक पवार आणि इतर नेते उपस्थित होते.

अहिल्यादेवी होळकर यांच्या पुतळ्याचं अनावरण झालं असल्याचा दावा भाजप आमदार गोपीचंद पडळकर यांनी केला होता. जेजुरी गडावर जेजुरी देवस्थानने उभारलेल्या पुण्यश्लोक अहिल्याबाई होळकर यांच्या पुतळ्याच्या अनावरणावरुन काल पहाटे गोंधळ झाल्याचं पाहायला मिळालं. पडळकर यांच्यावर शासकीय कामात अडथळा, जमावबंदीचे उल्लंघन आणि पोलिसांशी झटापट केल्याने जेजुरी पोलीस ठाण्यात गुन्हा दाखल करण्यात आला. या पार्श्वभूमीवर जेजुरीमध्ये मोठ्या प्रमाणात सुरक्षायंत्रणा तैनात करण्यात आल्या आहेत.