ट्रेलर दुभाजकाला धडकून पलटला, चालकाचा केबिनमध्ये अडकून जागीच मृत्यू

रायगड : रायगड जिल्ह्यातील मुंबई – गोवा राष्ट्रीय महामार्गावरील खैरेवाडी येथे ट्रेलर दुभाजकला धडकून भीषण अपघात झाला. या अपघातात ट्रेलर चालक पवन शिवाजी जाधव (वय ३३) याचा जागीच दुर्दैवी मृत्यू झाला. या अपघाताची नोंद नागोठाणे पोलीस ठाण्यात करण्यात आली आहे. रायगड जिल्ह्यात अपघातासाठी अत्यंत धोकादायक खिंड अशी ओळख असलेल्या सुकेळी खिंडीच्या उतारावरती खैरवाडी स्टॉपच्या समोर ट्रेलर दुभाजकाला धडकून हा अपघात झाला.

१६ डिसेंबर रोजी दुपारी २ वाजण्याच्या सुमारास हा अपघात झाला. कोलाड बाजुकडून वाकणच्या दिशेने कंटेनर घेऊन जाणारा ट्रेलर क्र. एमएच ४६ बीएम ६३३१ सुकेळी खिंडीच्या उतारावरती आला असता ट्रेलर चालकाचे गाडीवरील नियंत्रण सुटल्यामुळे ट्रेलर दुभाजकाला धडकला. या धडकेत ट्रेलरवरील कंटेनर १० ते १५ फुट अंतरावर उडून गेला आणि ट्रेलर पलटी झाला. ट्रेलर चालक पवन शिवाजी जाधव (वय ३३) हे केबिनमध्ये अडकून जागीच मृत्यूमुखी पडले.

सुदैवाने, या अपघाताच्या वेळी दुसरे कोणतेही वाहन घटनास्थळी उपस्थित नव्हते, ज्यामुळे मोठी जीवितहानी टळली. दरम्यान, अपघाताची माहिती मिळताच वाकण वाहतूक शाखेचे कर्मचारी तसेच ऐनघर ग्रामपंचायतीचे सदस्य यांनी घटनास्थळी धाव घेतली. हायड्राच्या सहाय्याने ट्रेलरचालकाला केबीनमधून बाहेर काढण्यात आले. त्यानंतर जिंदाल रुग्णालयाच्या रुग्णवाहीकेतून नागोठाणे सरकारी रुग्णालयात नेण्यात आले. या अपघाताचा पुढील तपास नागोठाणे पोलीस स्टेशनचे पोलीस निरीक्षक सचिन कुलकर्णी करीत आहेत.