पुण्यातील कडबनवाडी गावात प्रशिक्षणार्थी विमानाची शेतात क्रॅश लँडिंग, महिला पायलट थोडक्यात बचावली

पुणे : पुणे जिल्ह्यातील इंदापूर तालुक्यातील कडबनवाडी गावात कार्व्हर एव्हिएशनचे विमान एका शेतात कोसळले. आज सकाळी 11.30 च्या सुमारास प्रशिक्षणार्थी विमान शेतात कोसळल्याने हा अपघात झाला. या अपघातात 22 वर्षीय प्रशिक्षणार्थी पायलट भाविका राठोड जखमी झाली.

मिळालेल्या माहितीनुसार, या अपघातात पायलट भाविका राठोड किरकोळ जखमी झाल्या आहेत. बारामतीत कार्व्हर एव्हिएशनच्या माध्यमातून वैमानिकांना प्रशिक्षण दिले जाते. आज सकाळी विमानाने कार्व्हर एव्हिएशन बारामती येथून उड्डाण केले आणि काही वेळाने अपघात झाला. इंधन संपल्याने विमान क्रॅश झाल्याचे सांगण्यात येत आहे. मात्र, आत्तापर्यंत याबाबत पुष्टी झालेली नाही.

अपघातानंतर महिला पायलट स्वतः कॉकपिटमधून बाहेर पडली. महिला वैमानिकावर इंदापूर तालुक्यातील शेलगाव येथील खासगी रुग्णालयात उपचार सुरू आहेत. कार्व्हर एव्हिएशनचे अधिकारी घटनास्थळी पोहोचले आहेत, तर पोलिसांनी घटनास्थळ सील करून तपास सुरू केला आहे.