चोरट्यांनी बालेवाडीतील कन्स्ट्रक्शन साईटच्या लेबर कॅम्पमध्ये पाच घरे फोडली

पुणे : बालेवाडी येथील किवेस्ट कन्स्ट्रक्शन साईटच्या लेबर कॅम्प येथील पाच खोल्यांमध्ये घरफोडी करून ३६ हजार रुपये चोरल्याची घटना समोर आली आहे. याप्रकरणी चतुःश्रुगी पोलिस ठाण्यात गुन्हा दाखल करण्यात आला आहे. याबाबत मोहम्मद आलाम (वय २५) यांनी तक्रार दिली आहे. त्यानुसार अज्ञात व्यक्तीच्या विरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, बालेवाडी येथे किवेस्ट कन्स्ट्रक्शन साईट सुरू आहे. या ठिकाणी काम करणाऱ्या मजुरांची राहण्याची सोय तिथेच तयार केलेल्या खोल्यांमध्ये करण्यात आली आहे. एका खोलीत दोन कामगार राहतात. गुरूवारी सकाळी सात वाजता नेहमी प्रमाणे सर्व कामगार कामावर आल्यानंतर अज्ञात व्यक्तीने पाच खोल्यांचे कुलुप तोडून खोल्यांमध्ये प्रवेश केला. चोरट्याने संजय आलम, आफताब आलम, मिनाज, मोहम्मद जाफर, मोहंमद जहीर, आकीम आलम, जावेद आलम, अब्दुल बारी, सुनिल कुमार या सर्वांचे मिळून ३६ हजार रूपये चोरून नेले. सर्व कामगार दुपारी बाराच्या सुमारास कामावरून परतल्यानंतर चोरी झाल्याचे त्यांच्या लक्षात आले. त्यानंतर त्यांनी पोलिस ठाण्यात जाऊन तक्रार दाखल केली आहे.