पुण्यात उद्यापासून कलम १४४ लागू होणार, पोलिस आयुक्तांनी जारी केले आदेश

पुणे : गणेशोत्सवाच्या काळात कोरोनाचा धोका वाढण्याची शक्यता असल्यामुळे राज्यात गणेशोत्सव साध्या पद्धतीने साजरा करण्याचं आवाहन करण्यात आलं आहे. त्यामुळे अनेक जिल्ह्यांमध्ये नियम कठोर करण्यात आले आहेत. त्यातच आता पुण्यातही उद्यापासून जमावबंदी लागू करण्यात येणार आहे. पुणे पोलीस आयुक्त रवींद्र शिसवे यांनी याबाबतचे आदेश जारी केले आहेत.

मिळालेल्या माहितीनुसार, पुण्यामध्ये गणेशोत्सवाच्या काळात १० सप्टेंबर ते १९ सप्टेंबरपर्यंत कलम १४४ लागू असणार आहे. गणेशोत्सवाच्या काळात दक्षता म्हणून तब्बल सात हजार पोलिसांना तैनात करण्यात येणार आहे. सार्वजनिक ठिकाणी गर्दी होणार नाही, लोक बाहेर पडणार नाहीत आणि बाजारपेठेत नागरिकांची गर्दी होणार नाही, यासाठी पोलिसांना विशेष सूचना देण्यात आलेल्या आहेत. नागरिकांनी स्वतः शिस्त पाळून पोलिसांना सहकार्य करण्याचं आवाहन पोलिस आयुक्तांनी केलं आहे. गणेशोत्सवाच्या काळात कोरोनाचा प्रादुर्भाव वाढू नये म्हणून जमावबंदी लागू करण्याचा निर्णय पोलिसांनी घेतला आहे.