पुण्यात खळबळ! अनैतिक संबंधातून जन्मलेल्या बाळास सार्वजनिक शौचालयात कोंबले…

पुणे : अनैतिक संबंधातून जन्माला आलेल्या नवजात बाळास जन्मदात्या आईनेच प्रियकराच्या मदतीने सार्वजनिक शौचालयातील भांड्यात कोंबून ठेवल्याची धक्कादायक घटना समोर आली आहे. सिंहगडरोड परिसरातील वडगाव बुद्रुक येथील तुकाईनगर येथे ही घटना घडली आहे. परंतु, सुदैवाने पोलीस अंमलदार अजय माळी व कट्टे यांनी तात्काळ घटनास्थळी पोहचून नागरिकांच्या मदतीने व अथक परिश्रमाने शौचालयात कोंबलेल्या या नवजात अर्भकास बाहेर काढून त्याचे प्राण वाचविले आहेत.

पोलिसांनी दिलेल्या माहितीनुसार, तुकाई नगर, वडगाव येथे सार्वजनिक महिला समाज मंदिरामागे एका महिलेने नवजात अर्भकास जन्म देऊन शौचालयाच्या भांड्यामध्ये कोंबून ठेवले होते, असा कंट्रोलवरून सकाळी आठ वाजेच्या सुमारास कॉल आला. कॉलची माहिती मिळताच ड्युटीवर असलेले पोलीस अंमलदार माळी व कट्टे यांनी तात्काळ घटनास्थळी धाव घेतली.

पोलिसांना महिला शौचालयात हे नवजात बाळ भांड्यात कोंबलेले आढळून आले. ते रडत होते. पोलिसांनी नागरिकांच्या मदतीने तात्काळ हे बाळ भांड्यातून वरती काढण्याचा प्रयत्न केला. परंतु, हे बाळ अर्धे भांड्यात आणि अर्धे लाईनमध्ये अडकले होते. त्यातच रक्तश्राव होत होता. त्यांच्या अथक परिश्रमानंतर बाळाला भांड्यातून बाहेर काढण्यात यश आले. त्यानंतर बाळाला उपचारासाठी तात्काळ ससून रुग्णालयात दाखल केले.

दरम्यान, या निर्दयी आणि भयंकर प्रकारामुळे सर्वत्र तीव्र संतापाची लाट उसळली आहे. या निर्दयी महिलेस व तिच्या प्रियकरास ताबडतोड अटक करून कठोर कायदेशीर कारवाई करावी, अशी मागणी नागरिक करीत आहेत. हे नवजात बाळ मुलगा असल्याचे पोलिसांनी सांगितले.