पुण्यात टीव्हीएस बाईक सर्व्हिस सेंटरमध्ये भीषण आग

पुणे : सिंहगड रोडवरील नवशा मारुतीजवळील दुचाकी सर्व्हिस सेंटरला गुरुवारी सकाळी भीषण आग लागली. या आगीत सर्व्हिस सेंटरमध्ये ठेवण्यात आलेल्या सुमारे 20 ते 25 गाड्या जळून खाक झाल्याची माहिती अग्निशमन दलाच्या अधिकाऱ्यांनी दिली.

मिळालेल्या माहितीनुसार, टीव्हीएस बाईक सर्व्हिस सेंटरमध्ये सकाळी 7:45 च्या सुमारास आग लागली. याबाबत माहिती मिळताच पुणे महानगरपालिकेच्या अग्निशमन दलाच्या पाच गाड्या घटनास्थळी दाखल झाल्या. त्यानंतर २ तासांच्या अथक प्रयत्नांनंतर आगीवर नियंत्रण मिळवण्यात यश मिळाले. परंतु तोपर्यंत सर्व्हिस सेंटरमध्ये ठेवण्यात आलेल्या सुमारे 20 ते 25 गाड्या जळून खाक झाल्या. दरम्यान, शॉर्ट सर्किटमुळे आग लागल्याची शक्यता व्यक्त केली जात आहे.