नवले ब्रिज परिसरातील अपघातातील मृतांचा आकडा वाढला, सात जणांचा मृत्यू, 15 ते 20 जण जखमी

पुणे : पुणे-बंगळुरू महामार्गावरील नवले ब्रिज परिसरात गुरुवारी सायंकाळी भीषण अपघात झाला. दोन कंटेनर आणि एका कारचा झालेला हा अपघात इतका भीषण होता की, सात जणांचा जागीच मृत्यू झाला असून 15 ते 20 जण जखमी झाले आहेत. या अपघातानंतर महामार्गावरील वाहतूक पूर्णपणे ठप्प झाली होती.

मिळालेल्या माहितीनुसार, ट्रकचा ब्रेक फेल झाल्याने हा अपघात झाला. ब्रेक फेल झालेल्या ट्रकने पुढे असलेल्या पिकअप व्हॅनला धडक दिली. त्यामुळे पिकअप पलटी झाला आणि ट्रक पुढे असलेल्या अनेक गाड्यांना धडक देत एका कारवर जाऊन आदळला. या धडकेनंतर भीषण स्फोट झाला आणि मोठी आग लागली.

अग्निशमन दलाचे जवान तत्काळ घटनास्थळी दाखल झाले आणि आगीवर नियंत्रण मिळवले. मात्र, तोपर्यंत दोन कंटेनर आणि कार पूर्णतः जळून खाक झाले होते. या कारमध्ये अडकलेले काही लोक जिवंत जळाल्याची माहिती प्रत्यक्षदर्शींनी दिली आहे.

पुण्याचे डीसीपी संभाजी कदम यांनी सांगितले की, “सातारा-पुणे महामार्गावर ट्रकचा ब्रेक फेल झाल्याने त्याने पंधरा ते वीस वाहनांना धडक दिली. त्यानंतर ट्रक छोट्या कारवर आदळला आणि स्फोट झाला. त्यात कारमधील सर्वांचा मृत्यू झाला आहे.” काही जण अडकलेले असून, त्यांना बाहेर काढण्याचे काम सुरू असल्याचेही त्यांनी स्पष्ट केले.

दरम्यान, अपघातानंतर मृतदेह बाहेर काढण्याचे आणि जखमींना रुग्णालयात दाखल करण्याचे काम युद्धपातळीवर सुरू आहे. वाहतूक शाखेने महामार्गावरील वाहनांना वळविण्याची व्यवस्था केली आहे.