खडकवासलातून पाण्याचा २४,८२७ क्युसेकने विसर्ग; नदीपात्रातील पाणीपातळीत वाढ

पुणे : खडकवासला धरण प्रशासनाने मंगळवारी दुपारी मुठा नदीत सोडण्यात येणाऱ्या पाण्याच्या विसर्गात वाढ केली आहे. दुपारी ४:०० वाजेपूर्वी १९,३३४ क्युसेक इतका असलेला विसर्ग २४,८२७ क्युसेकपर्यंत वाढवण्यात आला असल्याची माहिती धरण अधिकाऱ्यांनी दिली.

पाटबंधारे विभागाने सांगितले की, गेल्या काही दिवसांपासून घाटमाथ्यावर आणि परिसरात झालेल्या मुसळधार पावसामुळे धरणात जलसाठा वेगाने वाढत आहे. यामुळे धरणातील जलपातळी नियंत्रित ठेवण्यासाठी विसर्ग वाढविणे आवश्यक झाले आहे. पावसाची तीव्रता आणि धरणात येणाऱ्या पाण्याच्या प्रवाहावरून विसर्गात पुढील काही तासांत आणखी बदल होऊ शकतात, असा इशारा विभागाने दिला आहे.

नदीकाठच्या नागरिकांनी व शेतकऱ्यांनी खबरदारी घेण्याचे, तसेच नदीपात्राजवळ जाणे टाळण्याचे आवाहन करण्यात आले आहे. अचानक पाण्याची पातळी वाढल्यास जनजीवन आणि शेतीला धोका निर्माण होऊ शकतो. पुण्यातील स्वारगेट येथील मुठा कालवे सिंचन उपविभागाचे उपविभागीय अभियंता मोहन भदाणे यांनी सांगितले की, “नागरिकांनी सतर्क राहावे, नदीपात्राजवळ वावरू नये, तसेच पुलांखाली किंवा धोकादायक ठिकाणी वाहन पार्क करू नयेत.”

सध्या धरणातून विसर्ग वाढल्यामुळे मुठा नदीच्या पात्रात पाण्याची पातळी झपाट्याने वाढत आहे. त्यामुळे पुणे शहरासह खडकवासला, सिंहगड रस्ता, वारजे, कोथरूड, तसेच नदीकाठच्या भागात राहणाऱ्या नागरिकांनी विशेष सतर्क राहणे गरजेचे असल्याचे पाटबंधारे विभागाकडून स्पष्ट करण्यात आले आहे.

यापूर्वी सकाळी धरणातून ११,८७८ क्युसेक इतका विसर्ग सुरू होता. दुपारपर्यंत तो १९,३३४ क्युसेकवर गेला आणि नंतर संध्याकाळी २४,८२७ क्युसेकपर्यंत वाढविण्यात आला आहे.

धरणक्षेत्रात आणि घाटमाथ्यावर पावसाचा जोर कायम राहिल्यास आणखी विसर्ग वाढू शकतो. त्यामुळे प्रशासनाने नागरिकांना वारंवार सूचना पाळण्याचे आणि सावध राहण्याचे आवाहन केले आहे.