छत्रपती संभाजीनगर येथील बोगस कामगार प्रकरणाची पुन्हा चौकशी करणार – कामगार मंत्री ॲड. आकाश फुंडकर

नागपूर : छत्रपती संभाजीनगर परिसरातील काही आस्थापनांमध्ये बोगस कामगार दाखवून त्यांच्या नावाने पगार काढल्याच्या प्राप्त तक्रारींची सखोल चौकशी करण्यात आली असून, संबंधित प्रकरणाची पुन्हा चौकशी करण्याचे निर्देश दिल्याची माहिती कामगार मंत्री ॲड. आकाश फुंडकर यांनी विधान परिषदेत दिली.

सदस्य शशिकांत शिंदे यांनी यासंदर्भात लक्षवेधी सूचना मांडली होती.

कामगार मंत्री ॲड. फुंडकर म्हणाले की, बोगस नोंदणी आणि पगाराच्या गैरव्यवहारांना आळा बसावा यासाठी बायोमेट्रिक हजेरी, ऑनलाईन नोंदणी, आणि आस्थापना मंडळ व संघटना यांच्या पडताळणीसह सर्टिफिकेशनची प्रक्रिया अनिवार्य आहे. माथाडी मंडळांमध्ये निरीक्षक व कर्मचाऱ्यांची नव्याने भरती करण्याची प्रक्रिया मार्गी लावली जात असल्याचेही त्यांनी यावेळी सांगितले.

कामगार मंत्री ॲड. फुंडकर म्हणाले, या प्रकरणाची पुन्हा चौकशी करण्यात येईल. भविष्यातील धोरणात्मक बदलांसाठी सर्वपक्षीय मार्गदर्शन घेण्यात येईल, असेही त्यांनी सांगितले.