तरुणीला दारू पाजून तिच्यावर बलात्कार करणाऱ्या नृत्य शिक्षकाला अटक

नागपूर : २२ वर्षीय तरुणीला दारू पाजून नृत्य शिक्षकाने तिच्यावर बलात्कार केल्याची घटना समोर आली आहे. रोमियो गजानन गोडबोले (वय २५), असे या नृत्य शिक्षकाचे नाव आहे. अजनी पोलिसांनी यासंदर्भात गुन्हा दाखल करून या व्यक्तीला अटक केली आहे.

पीडित तरुणी मूळची वर्ध्याची असून तिचे अभियांत्रिकीचे शिक्षण पूर्ण झाले आहे. स्पर्धा परीक्षेच्या अभ्यासामुळे ती तणावात होती. काही दिवसांपूर्वी तिची सोशल मीडियावर या नृत्य शिक्षकासोबत ओळख झाली. त्याने तिला आश्वासन दिले की तो तिला तणावातून बाहेर येण्यास मदत करेल. धुलीवंदनाच्या दिवशी तो तरुणीच्या फ्लॅटमध्ये गेला. तेथे तिला तणाव दूर करण्यासाठी दारू पिण्याचा सल्ला दिला. तरुणीने दारू प्यायली. ती नशेत असताना त्याने तिच्यावर अत्याचार केला. तसेच तिचे अश्लील फोटो देखील काढले.

काही वेळाने तरुणी शुद्धीवर आली. त्यावेळी तिच्यावर अत्याचार झाल्याचं तिच्या लक्षात आलं. त्याबाबत तिने गोडबोलेला जाब विचारला. त्यावर त्याने तरुणीला काढलेले फोटो दाखवले आणि ते व्हायरल करण्याची धमकी दिली. तरुणीने या धमकीला न घाबरता नातेवाइकासोबत जाऊन अजनी पोलिस स्टेशनमध्ये गोडबोलेविरोधात तक्रार दाखल केली. पोलिसांनी गुन्हा दाखल करून गोडबोलेला अटक देखील केली आहे.