मुंबई-गोवा महामार्गावर भीषण अपघात, तिघांची प्रकृती गंभीर तर अनेक जण जखमी

पनवेल : मुंबई-गोवा महामार्गावर 2 बसची धडक होऊन भीषण अपघात झाला आहे. पनवेलजवळ ही घटना घडली. या अपघातात दोन्ही बसचे चालक गंभीर जखमी झाले आहेत. यात तीन जण गंभीर जखमी झाले आहेत, तर सुमारे १५ जण जखमी झाले असून त्यांना उपचारासाठी रुग्णालयात दाखल करण्यात आले आहे. माहिती मिळताच पोलिसांनी तात्काळ घटनास्थळी धाव घेतली.

मुंबई-गोवा महामार्गावर दोन बसची धडक होऊन हा अपघात झाला. मात्र, अपघाताचे कारण अद्याप समजू शकलेले नाही. अपघात होताच प्रवाशांमध्ये घबराट पसरली. बराच वेळ प्रवाशांना काय करावे समजत नव्हते. माहिती मिळताच पोलीस घटनास्थळी पोहोचले, त्यांनी तातडीने जखमींना बसमधून बाहेर काढून रुग्णालयात पाठवले. जखमींपैकी काही प्रवाशांची प्रकृती गंभीर आहे. जखमींच्या नातेवाईकांना याबाबत माहिती देण्यात आली आहे.

दरम्यान, अपघातानंतर महामार्गावर बराच वेळ ट्राफिक जाम झाला होता. वाहतूक व्यवस्था लवकरात लवकर पूर्ववत करण्यासाठी पोलीस कार्यरत आहेत, बस हटवण्यात येत आहेत. दुसरीकडे, काही प्रवाशांनी सांगितले की अपघात अचानक झाला, कोणालाही सावरण्याची संधी मिळाली नाही.