अनिल देशमुख यांच्या मुलाचीही होणार ईडीकडून चौकशी

मुंबई : ईडीने अनिल देशमुख यांना आतापर्यंत तीनवेळा चौकशीसाठी समन्स बजावले आहे. मात्र देशमुख यांच्याकडून विविध कारणे पुढे केली जात आहेत. अशातच आता अनिल देशमुख यांचा मुलगा ऋषीकेश देशमुख यांनाही ईडीकडून चौकशीसाठी बोलावण्यात आलं आहे. मुंबईचे माजी पोलिस आयुक्त परमबीर सिंह यांनी केलेल्या १०० कोटी वसुलीच्या गंभीर आरोपानंतर अनिल देशमुख यांनी मंत्रिपदाचा राजीनामा दिला आणि त्यांची ईडी चौकशीही सुरू झाली.

दरम्यान, अनिल देशमुख यांना ५ जुलै रोजी चौकशीसाठी हजर राहण्यास सांगण्यात आले असून याच प्रकरणात मुलगा ऋषीकेश यांना ६ जुलै रोजी चौकशीसाठी उपस्थित राहण्याचे सांगण्यात आल्याची माहिती मिळत आहे. काही दिवसांपूर्वी ईडीकडून अनिल देशमुख यांच्या घरावर छापे टाकण्यात आले आहेत. त्यानंतर त्यांच्या स्वीय सहाय्यकाला आणि खासगी सचिवाला ताब्यात घेण्यात आले आहे.