१३ वर्षीय मुलाची गळफास घेऊन आत्महत्या, ऑनलाइन मोबाइल गेम खेळण्याच्या नादात…

मुंबई : मुंबईतील दादरमधील हिंदमाता परिसरात एक खळबळजनक घटना उघडकीस आली आहे. दादरमध्ये एका १३ वर्षीय मुलाने गळफास घेऊन आत्महत्या केली. मोबाइल गेम खेळताना टास्क पूर्ण करण्याच्या नादात त्याने हे पाऊल उचलल्याचा संशय व्यक्त केला जात आहे. भोईवाडा पोलीस यासंदर्भात तपास करत आहेत.

मिळालेल्या माहितीनुसार, १३ वर्षीय मुलगा सातवी इयत्तेत शिकत होता, परंतु तो सतत ऑनलाइन मोबाइल गेम खेळात असायचा. मुलाचे वडील एका खासगी कंस्ट्रक्शन कंपनीत काम करतात. रविवारी संध्याकाळी ते आपल्या पत्नीसोबत बाहेर गेले होते. यावेळी मुलाने त्यांना फोन केला पण प्रवासात असल्याने ते फोन उचलू शकले नाहीत. त्यांनी काही वेळाने मुलाला फोन केला मात्र मुलाने फोन उचलला नाही. त्यांना चिंता वाटल्यामुळे ते तात्काळ घरी आले. मात्र दरवाजा आतून लावलेला होता. त्यांनी दाराच्या वरच्या बाजूस असलेली काच फोडून दरवाजा उघडला, त्यावेळी त्यांना मुलाचा मृतदेह आढळून आला.

घटनेची माहिती मिळताच भोईवाडा पोलीस घटनास्थळी पोहोचले. मुलाचा मृतदेह विच्छेदनासाठी रुग्णालयात नेण्यात आला. पोलिसांनी प्राथमिक तपास केला असता, त्याने इतके टोकाचे पाऊल का उचलले याचे नेमके कारण समजू शकलेले नाही. मुलगा खूपच हुशार होता. त्याला क्रिकेटची आवड होती. मुलाला ऑनलाइन मोबाइल गेम खेळण्याची सवय असल्याचे समोर आले. पोलिसांनी त्यादृष्टीने तपस सुरु केला आहे. गेम खेळताना काही असं घडलं का, की मुलाने इतके टोकाचे पाऊल उचलले, याचाही तपास केला जात आहे.