विधानपरिषद पोटनिवडणुक : धुळे-नंदुरबारमधून भाजपचे अमरीश पटेल विजयी, महाविकास आघाडीला धक्का

धुळे : धुळे आणि नंदुरबार स्थानिक स्वराज संस्थेच्या विधानपरिषद पोटनिवडणुकीच्या मतमोजणीत भाजपने दणदणीत विजय मिळवला आहे. धुळे-नंदुरबारमधून भाजपचे अमरीश पटेल यांनी दणदणीत विजय मिळवला आहे. महाविकास आघाडीच्या उमेदवाराचा २३४ मतांनी पराभव झाला.

अमरीश पटेल यांना ३३२ मते मिळाली आहेत. महाविकास आघाडीचे उमेदवार अभिजीत पाटील यांना केवळ ९८ मतं मिळाली. चार मते बाद झाली. या निवडणुकीत एकूण ४३७ मतदारांपैकी ४३४ मतदारांनी मतदानाचा हक्क बजावला होता. विधान परिषदेच्या सहा जागांसाठी १ डिसेंबर रोजी झालेल्या निवडणुकीची मतमोजणी आज होत आहे. तीन पदवीधर, दोन शिक्षक व एका स्थानिक स्वराज्य संस्था मतदारसंघात ही निवडणूक झाली होती. त्यापैकी धुळे-नंदुरबार स्थानिक स्वराज्य संस्था मतदारसंघातील निवडणुकीचा निकाल लागला आहे. सकाळी आठ वाजता मतमोजणी सुरू झाली. त्यानंतर काही वेळातच विजयी उमेदवाराच्या नावाची घोषणा करण्यात आली.