नव्या पिढीचे शिल्पकार! डॉ. सोमनाथ गिते यांच्या व्यसनमुक्तीच्या कार्याचा ‘इंडिया बुक ऑफ रेकॉर्ड’कडून गौरव

पुणे : आजकाल तरुणाई व्यसनाच्या विळख्यात अडकताना दिसत आहे. हा विळखा तरुणाईसोबतच देशाचे भवितव्य देखील जखडून ठेवत आहे. आज आपला देश अनेक गोष्टींमध्ये जगापुढे एक आदर्श ठेवत असताना देशाची भावी पिढी सक्षम असणे आणि तिच्यात नीतिमूल्ये रुजवणे ही अतिशय महत्वपूर्ण जबाबदारी आहे. व्यसनमुक्तीसाठी काम करणारे कार्यकर्ते ही जबाबदारी पेलण्यासाठी सरसावले असून यादृष्टीने भरीव काम करत आहेत. त्याअर्थाने एकप्रकारे हे सर्वजण नव्या पिढीचे शिल्पकार आहेत, असे म्हटल्यास ते वावगे ठरणार नाही.

याच विषयावर अनेक वर्षांपासून काम करणारे कार्यकर्ते डॉ. सोमनाथ गिते यांच्या कार्याचा गौरव इंडिया बुक ऑफ रेकॉर्ड, युनिक वर्ल्ड रेकॉर्ड या संस्थांनी केला आहे. INDIA’S WORLD RECORDS मध्ये अगोदरच त्यांच्या नावावर विक्रम नोंदवला गेला आहे.

समुपदेशन, वर्तमानपत्रं, मासिक, सोशल माध्यमांतून जनजागृती करत समाजात व्यसनमुक्ती चळवळीचे काम डॉ. सोमनाथ गिते यांनी केले आहे. या कार्याचा गौरव म्हणून त्यांना सन्मानित करण्यात आले असून यापूर्वी त्यांच्या सामाजिक क्षेत्रातील भरीव योगदानाची आणि या क्षेत्रातील त्यांनी केलेल्या अभ्यासाची दखल घेत विश्वकर्मा युनिव्हर्सिटी फॉर सेल्फ एम्प्लॉयमेंटकडून डॉक्टरेट पदवी बहाल करण्यात आली. तसेच, व्यसनमुक्ती गौरव पुरस्कार २०२२, राज्यस्तरीय आदर्श कार्यगौरव समाजरत्न पुरस्कार २०२२, राष्ट्रपिता महात्मा गांधी व्यसनमुक्ती सेवा पुरस्कार २०२२ असे अनेक पुरस्कार मिळालेले आहेत.

माजी राज्यपाल भगतसिंग कोश्यारी, जेष्ठ समाजसेवक डॉ. प्रकाश बाबा आमटे, राष्ट्रवादी काँग्रेसचे अध्यक्ष शरद पवार, डॉ. मुक्ता पुणतांबेकर, माजी महसूलमंत्री बाळासाहेब थोरात, खासदार सुप्रिया सुळे, स्व. मुक्ता टिळक, आमदार भीमराव तापकीर, माजी नगरसेवक युवराज बेलदरे यांच्यासह अनेक राजकीय, सामाजिक, शैक्षणिक, वैद्यकीय अशा विविध क्षेत्रातील मान्यवरांनी त्यांच्या कार्याचे कौतुक केले आहे.