एकनाथ शिंदेंच्या भेटीनंतर गिरीश महाजनांची माहिती, समन्वयाचा अभाव पण महायुतीत मतभेद नाही…

मुंबई : राज्याचे काळजीवाहू मुख्यमंत्री एकनाथ शिंदे हे त्यांच्या दरे गावी गेले असताना त्यांची तब्येत बिघडली आणि तिथेच त्यांच्यावर उपचार करण्यात आले. त्यानंतर ते ठाण्यात आपल्या निवासस्थानी पोहोचले. पण, अद्यापही शिंदेंना विश्रांतीची गरज असल्याचे सांगण्यात आले. यादरम्यान, भाजपचे नेते गिरीश महाजन यांनी शिंदेंच्या निवासस्थानी जाऊन त्यांची भेट घेतली आणि त्यांच्या तब्येतीची विचारपूस केली. यावेळी सत्तास्थापनेत जो पेच निर्माण झाला आहे, त्याबाबतही चर्चा झाल्याची माहिती आहे.

एकनाथ शिंदेंच्या भेटीनंतर गिरीश महाजन यांनी त्यांच्या तब्येतीबाबत अपडेट दिली. मुख्यमंत्र्यांना व्हायरल झाला असून त्यांना तापही आहे. सध्या त्यांच्यावर उपचार सुरु असून सलाईन दिली जात आहे. ते लवकरच बरे होतील आणि ते पुन्हा कामकाजात सक्रिय होतील, असं महाजन म्हणाले. आज फक्त त्यांच्या तब्येतीची विचारपूस करण्यासाठी आलो होतो. महायुतीमध्ये सर्व ठीक आहे आणि कुठलाही मतभेद नाही, असंही ते म्हणाले.

महाजनांनी मंत्रिमंडळ विस्तारासंबंधी सुरु असलेल्या चर्चांवरही स्पष्टीकरण दिलं. याबाबत शिंदेंसोबत काहीही चर्चा झालेली नाही. हा निर्णय वरिष्ठ स्तरावर घेतला जाईल, असं गिरीश महाजन म्हणाले. दीपक केसरकर आणि बावनकुळे यांच्यातील समन्वयाच्या अभावावर बोलताना महाजन म्हणाले की, समन्वयाचा थोडा अभाव होता हे खरे असले तरी आता सर्व काही ठीक आहे. ५ तारखेला होणारा शपथविधी सोहळा अत्यंत दिमाखदार असेल. महाजन यांनी महायुतीत कुठलाही मतभेद नाही आणि याबाबत सर्व चर्चा खोटी असल्याचे स्पष्ट केले.