साप चावल्याने पाच वर्षीय मुलाचा मृत्यू, अंथरुणातच होता विषारी साप…

बुलढाणा : बुलढाणा जिल्ह्यातील इसरूळ येथे एका पाच वर्षीय मुलाचा साप चावल्याने मृत्यू झाल्याची घटना घडली आहे. हा चिमुकला घरात आई-वडिलांसोबत अंथरुणावर झोपलेला असताना मण्यार जातीच्या सापाने चावा घेतल्याने त्याचा दोन तासात मृत्यू झाला. ही घटना मंगळवार २४ सप्टेंबर रोजी इसरूळ तालुका चिखली येथे घडली.

शेक मेहबूब शेख गफुर हे आपल्या कुटुंबासह नेहमीप्रमाणे घरामध्ये खाली अंथरूण टाकून झोपलेले होते. दरम्यान, पहाटे साडेपाच वाजताच्या सुमारास त्यांना त्यांच्या मुलाचा रडण्याचा आवाज आल्याने जाग आली. त्यांनी उठून पाहिले असता त्यांना अंथरुणावर साप दिसला. मुलाला कुठे साप चावला का हे त्यांनी बघितले मात्र, त्यांना काहीच दिसून आले नाही. काहीवेळाने मुलाला त्रास जाणवू लागल्याने त्यांनी सापाला मारून मुलाला उपचारासाठी रुग्णालयात भरती केले. परंतू साप अतीशय विषारी असल्याने आणि वेळेत उपचार न मिळाल्याने त्या चिमुकल्याचा दुर्दैवी मृत्यू झाला. या घटनेनं परिसरात सर्वत्र हळहळ व्यक्त करण्यात येत आहे.