लातूर : बस आणि कारचा भीषण अपघात, पाच जण जागीच ठार

लातूर : लातूर जिल्ह्यातील उदगीर जवळ बस आणि कारचा भीषण अपघात झाला आहे. या अपघातात पाच जण जागीच ठार झाले असून एक महिला गंभीर जखमी झाली आहे. या अपघातात कारचा अक्षरशः चक्काचूर झाला, तर बस चालकाच्या बाजूचा बसचा भाग कापला केला. या अपघातात अलोक तानाजी खेडकर (रा. संत कबीर नगर, उदगीर), अमोल जीवनराव देवक्तते (रावनकोळा), कोमल व्यंकट कोदरे (रा. डोरणाळी, ता मुखेड), यशोमती जयवंत देशमुख (यवतमाळ) आणि नागेश ज्ञानेश्वर गुंडेवार (रा. बिदर रोड, उदगीर) यांचा मृत्यू झाला. तर, प्रियांका गजानन बनसोडे (रा. एरोळ ह. मु. गोपाळ नगर, उदगीर) या जखमी झाल्या आहेत.

आज सकाळी उदगीर आगाराची एसटी बस उदगीरहून चाकूरकडे जात होती तर स्विफ्ट कार तुळजापूरहून दर्शन घेऊन उदगीरकडे येत होती. दरम्यान, लोहाऱ्याजवळ बस आणि कारची समोरासमोर जोरदार धडक झाली. अपघाताची माहिती मिळताच घटनास्थळी उदगीरचे उपविभागीय पोलीस अधिकारी डॅनियल बेन व शहर पोलीस ठाण्याचे तसेच उदगीर ग्रामीण पोलीस ठाण्याचे पोलीस कर्मचारी दाखल झाले. जखमी महिलेला रुग्णालयात दाखल करण्यात आले असून उपचार सुरू आहेत. घटनास्थळाचा पंचनामा करून सर्व मृतदेह शवविच्छेदनासाठी सामान्य उपजिल्हा रुग्णालयात पाठवण्यात आले आहेत.