ब्रेकिंग : रत्नागिरीतील लोटे एमआयडीसीतील घारडा केमिकल कंपनीत स्फोट, तीन कामगार ठार

रत्नागिरी : रत्नागिरीतील लोटे एमआयडीसी मधील घारडा केमिकल कंपनीत स्फोट झाला आहे. या कंपनीच्या ७ नंबरच्या प्लांटमध्ये २ स्फोट झाल्याची माहिती मिळत असून या स्फोटानंतर कंपनीला आग लागली आहे. दरम्यान, घटनास्थळी अग्निशमन दलाकडून आगीवर नियंत्रण मिळवण्यासाठी युद्धपातळीवर प्रयत्न सुरू आहेत. पोलीस आणि अग्निशमन दलाच्या जवानांकडून मदत आणि बचावकार्य सुरू करण्यात आले आहे.

मिळालेल्या माहितीनुसार, या स्फोटात कंपनीतील तिघांचा मत्यू झाला असून काही कर्मचारी जखमी झाले आहेत. केमिकल अंगावर पडल्यामुळे जखमी झालेल्या कर्मचाऱ्यांना उपचारासाठी रुग्णालयात दाखल कऱण्यात आले आहे. हा स्फोट नेमका कशाचा होता आणि कशामुळे झाला याचे कारण अद्याप कळू शकलेले नाही. मात्र, कंपनीत आग लागल्याने काही कर्मचारी कंपनीतच अडकले असल्याची भीती व्यक्त केली जात आहे. मदत आणि बचावकार्य सुरू आहे.