ब्रेकिंग : भाजप युवा मोर्चाच्या कार्यकर्त्यांनी उपमुख्यमंत्री अजित पवार यांची गाडी अडवली

नागपूर : नागपूरजवळील वाडी परिसरात भारतीय जनता युवा मोर्च्याच्या कार्यकर्त्यांनी उपमुख्यमंत्री अजित पवार यांच्या गाडीचा ताफा अडवण्याचा प्रयत्न केला. वाढीव वीज बिलाच्या मुद्द्यांवरुन भारतीय जनता युवा मोर्च्याच्या कार्यकर्त्यांनी आक्रमक पवित्रा घेतला असून यावेळी थेट उपमुख्यमंत्र्यांनाच घेराव घातला.

राज्यात लॉकडाऊनच्या काळात जनतेला वाढीव वीज बील आले आहेत. वीज बिलातून ग्राहकांना सूट द्यावी या मागणीसाठी भाजपनं आक्रमक भूमिका घेतली आहे. शुक्रवारी भाजपनं वाढीव वीज बिलाच्या मुद्द्यावर सरकारविरोधात आंदोलनही केलं होतं. त्यानंतर आज भारतीय जनता युवा मोर्च्याच्या कार्यकर्त्यांनी थेट उपमुख्यमंत्री अजित पवार यांची गाडी अडवली आहे.

वाढीव वीज बिल माफीची मागणी करणारे निवेदन देण्यासाठी भारतीय जनता युवा मोर्चाचे कार्यकर्ते जमले होते. मात्र, अजित पवार गाडी न थांबवता निघून जात होते. तसंच, आमचं निवेदनही त्यांनी स्विकारलं नाही. म्हणून त्यांच्या गाडीचा ताफा अडवण्याचा प्रयत्न केला, असं भारतीय जनता युवा मोर्च्याच्या कार्यकर्त्यांनी यावेळी म्हटलं आहे.