धक्कादायक : नौदलातील अधिकाऱ्याचं अपहरण, खंडणी देण्यास नकार दिल्यावर जिवंत जाळलं

घोलवड पोलीस ठाणे हद्दीतील पालघरमधील वेवजीच्या जंगलात एक अतिशय धक्कादायक घटना घडली आहे. नौदलात अधिकारी पदावर कार्यरत असलेल्या सुरजकुमार मिथिलेश दुबे (वय २७) यांचे अपहरण करून वेवजीच्या जंगलात अंगावर पेट्रोल टाकून त्यांना जिवंत जाळण्यात आले. ही घटना शुक्रवारी(५ फेब्रुवारी) घोलवड पोलीस ठाणे हद्दीत घडली आहे. सुरजकुमार दुबे यांना उपचारासाठी मुंबईला नेले जात असताना रस्त्यातच त्यांचा मृत्यू झाला.

मिळालेल्या माहितीनुसार, सुरजकुमार दुबे हे मूळचे झारखंडमधील रांची येथील आहेत. ते २०१९ पासून नौदलात कार्यरत होते. सध्या ते आयएनएस अग्रणी या नौकेवर कर्तव्य बजावत होते. ३० जानेवारी रोजी सुट्टी संपल्याने ते रांची येथून विमानाने निघाले. सकाळी नऊ वाजेच्या सुमारास ते चेन्नई येथे विमानतळावर पोहोचले तेव्हा तीन अज्ञातांनी त्यांच्यावर बंदूक रोखली व त्यांना जबरदस्ती एका गाडीत बसवून त्यांचे हात-पाय बांधले. अपहरण केल्यानंतर त्यांच्याकडे १० लाख रुपयांची खंडणी मागितली. सुरजकुमार दुबे यांनी ही रक्कम देण्यास नकार दिला होता.