तळोजा औद्योगिक वसाहतीत कारखान्याला लागलेल्या आगीत अग्निशमन दलाच्या जवानाचा मृत्यू

पनवेल : तळोजा औद्योगिक वसाहतीमधील कारखान्याला लागलेल्या आगीत अग्निशमन दलाच्या एका जवानाचा गुदमरुन दुर्दैवी मृत्यू झाला आहे. बाळू देशमुख असं मृत जवानाचे नाव आहे. औद्योगिक क्षेत्रात भूखंड क्रमांक जे-39 वर असलेल्या मोदी केमिकल या रसायनांवर प्रक्रिया करणाऱ्या कारखान्याला काल (5 डिसेंबर) रात्री 12 च्या सुमारास आग लागली.

घटनेची माहिती मिळताच अग्निशमन दलाचे जवान तात्काळ घटनास्थळी पोहोचले. अग्निशमन दलाच्या जवानांना पहाटे 5 वाजताच्या सुमारास या आगीवर नियंत्रण मिळवण्यात यश मिळालं. मात्र आगीवर नियंत्रण मिळवण्याच्या प्रयत्नात अग्निशमन दलाचे जवान बाळू देशमुख यांचा मृत्यू झाला. ते अंबरनाथ अग्निशमन दलाच्या पथकात कार्यरत असल्याची माहिती आहे. जखमी जवानांना जवळच्या एमजीएम रुग्णालयात दाखल करण्यात आलं आहे. श्वसनाचा त्रास होऊ लागल्याने इतर जवानांना एमजीएम रुग्णालयात दाखल करण्यात आले आहे. रुग्णालयात दाखल करण्यात आलेल्यांमध्ये तळोजा औद्योगिक क्षेत्रातील अग्निशमन दलाचे प्रमुख दीपक दोरुगडे यांचा देखील समावेश आहे.