१६ वर्षांच्या मुलाला वन्यप्राण्याने उचलून नेले, चोवीस तासातील अशी दुसरी घटना…

चंद्रपूर : चंद्रपूर महाऔषणीक केंद्राच्या समोर असलेल्या दुर्गापूर नेरी येथून अल्पवयीन मुलाला वन्यप्राण्याने उचलून नेले. रात्री ११ वाजण्याच्या सुमारास १६ वर्षांच्या या मुलाला वन्य प्राण्याने उचलून नेल्याने खळबळ उडाली आहे. हा मुलगा दुर्गापूर वॉर्ड नंबर १ मध्ये आदिवासी आश्रम शाळेच्या मागील परिसरात राहत होता. याच परिसरात ही घटना घडल्याचे सांगितले जात आहे. हा वन्य प्राणी वाघ आहे की बिबट्या याचा अद्याप शोध लागलेला नाही.

चोवीस तासातील ही दुसरी घटना आहे. चंद्रपूर वीज केंद्रात काल बुधवारी रात्री भोजराज मेश्राम या कामगाराला उचलून नेले होते. त्यानंतर गुरुवारी पहाटे त्याचा मृतदेह मिळाला होता. वन विभाग मुलाचा शोध घेत आहे. हा संपूर्ण परिसर ताडोबा व्याघ्र प्रकल्पाच्या जंगलाला लागून आहे. या परिसरात सध्या भीतीचे वातावरण निर्माण झाले आहे.