रशियाकडून युद्धविराम घोषित! अडकलेले लोक बाहेर पडेपर्यंत हल्ला करणार नसल्याचे आश्वासन

रशिया – युक्रेन युद्ध : रशिया आणि युक्रेनमध्ये सुरू असलेल्या युद्धादरम्यान आतापर्यंतची सर्वात मोठी बातमी समोर आली आहे. रशिया आणि युक्रेनमध्ये 10 दिवस चाललेल्या युद्धादरम्यान रशियाने युद्धविराम घोषित केला आहे. यामुळे संपूर्ण जगाने सुटकेचा नि:श्वास सोडला आहे.

रशियाने म्हटले आहे की रशियाने नागरिकांसाठी मानवतावादी कॉरिडॉर उघडण्यासाठी ७ वाजेपासून युक्रेनमध्ये युद्धविराम घोषित केला आहे. भारतीय वेळेनुसार 11.30 वाजता युद्धविराम लागू होईल, पण तो युक्रेनच्या दोन शहरांमध्येच लागू असेल. नुकतेच भारताचे पंतप्रधान नरेंद्र मोदी यांनी रशियाचे अध्यक्ष व्लादिमीर पुतिन यांच्याशी बोलून युद्ध थांबवण्याचे आवाहनही केले होते. यादरम्यान रशियाच्या राष्ट्राध्यक्षांनी ६ तास युद्ध थांबवण्याचे मान्य केले होते.

या दोन शहरांमध्ये युद्ध थांबेल
ज्या दोन शहरांसाठी रशियाने युद्धविराम जाहीर केला आहे ती म्हणजे मारियुपोल आणि वोलनोवाखा. येथे युद्धविराम लागू केला जाईल. रशियाने युक्रेनमध्ये युद्धविराम जाहीर केला आहे. या अंतर्गत, जोपर्यंत येथे अडकलेल्या लोकांना बाहेर काढले जात नाही, तोपर्यंत रशियाकडून कोणताही हल्ला होणार नाही, असे सांगण्यात आले आहे. यापूर्वी रशियन राजदूताने संयुक्त राष्ट्र सुरक्षा परिषदेला सूचित केले आहे की भारतीय विद्यार्थ्यांना आणि इतर परदेशी नागरिकांना बाहेर काढण्यासाठी पूर्व युक्रेनमधील खार्किव आणि सुमी शहरांमधील क्रॉसिंग पॉईंटवर रशियन बसेस तयार आहेत.

सरकारच्या म्हणण्यानुसार, युक्रेनमध्ये अजूनही अडीच हजारांहून अधिक विद्यार्थी अडकले आहेत. हा ग्रीन कॉरिडॉर झाला, तर अडकलेल्या विद्यार्थ्यांना सुखरूप बाहेर काढण्यात मोठा हातभार लागेल. यामुळे केवळ भारतीय विद्यार्थ्यांनाच नाही तर या युद्धामुळे युक्रेनमध्ये अडकलेल्या प्रत्येक व्यक्तीला मदत होणार आहे.

शनिवारी युद्धविराम घोषित होण्यापूर्वी रशियन सैन्याने कीवजवळील बुका येथे सामान्य जनतेवर गोळीबार केला. या गोळीबारात 17 वर्षीय मुलीसह दोन जणांचा मृत्यू झाला आहे. बुका येथे रशियन सैनिकांनी एका कारवरही गोळीबार केल्याचा दावा युक्रेनियन मीडियाने केला आहे. या हल्ल्यात ४ जण जखमी झाले आहेत.