कोरोना विषाणूचा नवीन व्हॅरिएंट ओमिक्रॉन किती घातक आहे? जाणून घ्या…

कोरोना विषाणूचा नवीन व्हॅरिएंट B.1.1.529 (ओमिक्रॉन) ने जगासमोर एक नवीन संकट निर्माण केले आहे. WHO ने याबद्दल चिंता व्यक्त केली आहे. जगभरातील तज्ञांचा दावा आहे की ओमिक्रॉन सारख्या धोकादायक प्रकारांवर मोनोक्लोनल अँटीबॉडी थेरपीचा कोणताही प्रभाव होत नाही. या प्रकारातील ताकद आणि वैशिष्ट्यांबाबत अनेक नवीन गोष्टीही समोर आल्या आहेत.

ओमिक्रॉन किती घातक आहे?

दक्षिण आफ्रिकेसह इतर देशांमध्ये ओमिक्रॉन संसर्गाच्या प्राथमिक विश्लेषणाच्या आधारे हा व्हॅरिएंट डेल्टा प्रकारापेक्षा सहापट अधिक शक्तिशाली असल्याचे सांगितले जात आहे. डेल्टा हा तोच प्रकार आहे ज्याने भारतात कोरोनाच्या दुसऱ्या लाटेत कहर केला होता. न्यूयॉर्क टाईम्सच्या अहवालानुसार, ओमिक्रॉन मागील प्रकारांपेक्षा जास्त संसर्गजन्य आहे आणि लसीकरण किंवा नैसर्गिक संसर्गामुळे होणारी रोगप्रतिकारक क्षमता देखील निष्क्रिय करू शकतो.

तज्ञांच्या मते, व्हायरसची आतापर्यंतची सर्वात उत्परिवर्तित आवृत्ती ओमिक्रॉनमध्ये दिसली आहे. एका विषाणूमध्ये इतके उत्परिवर्तन यापूर्वी कधीही दिसले नव्हते. त्यामुळेच शास्त्रज्ञांना या नव्या प्रकाराची चिंता सतावत आहे. शास्त्रज्ञांचे म्हणणे आहे की ओमिक्रॉन आधीच्या बीटा आणि डेल्टा प्रकारांपेक्षा अनुवांशिकदृष्ट्या भिन्न आहे, परंतु हे अनुवांशिक बदल त्याला अधिक धोकादायक बनवतात की नाही हे अद्याप समजलेले नाही.

डेल्टा प्रकारावर मोनोक्लोनल अँटीबॉडी थेरपीचा प्रभाव होत असल्याचे दिसून येते. या थेरपीचा डेल्टा प्लस प्रकारावर कोणताही परिणाम होत नसला तरी, कोविड-19 संसर्गाच्या सुरुवातीच्या टप्प्यात एक चमत्कारिक उपचार मानला जातो. डेल्टा प्लस प्रकारानंतर, ओमिक्रॉन हा दुसरा प्रकार आहे ज्यावर मोनोक्लोनल अँटीबॉडी थेरपीचा प्रभावित होत नाही.

दक्षिण आफ्रिकेतील डॉक्टर अँजेलिक कोएत्झी काय म्हणाल्या?

दक्षिण आफ्रिकेत सर्वात पहिल्यांदा ओमिक्रॉन प्रकार ओळखणाऱ्या डॉक्टर अँजेलिक कोएत्झी यांनी सांगितले की, ‘मी पहिल्यांदा त्याची लक्षणे सुमारे 30 वर्षांच्या तरुणामध्ये पाहिली.’ हा रुग्ण खूप थकलेला होता. दोन दिवसापासून डोकेदुखीसह संपूर्ण शरीरात वेदना होत असल्याची त्याची तक्रार होती. त्याला शिंका येण्यासारख्या समस्याही होत्या. तथापि, त्याला खोकला नव्हता किंवा चव आणि वास कमी झाल्यासारखी कोणतीही लक्षणे दिसत नव्हती.

डॉ. कोएत्झी यांनी सांगितले की, जेव्हा त्यांना दक्षिण आफ्रिकेत कोविड-19 च्या नवीन प्रकाराची लागण झालेली व्यक्ती आढळली, तेव्हा त्यांनी त्यांच्या संपूर्ण कुटुंबाची तपासणी केली. दुर्दैवाने, कुटुंबातील सर्व सदस्य संसर्गाच्या विळख्यात होते. तथापि, सर्व संक्रमितांमध्ये अतिशय सौम्य लक्षणे दिसून आली. डॉ कोएत्झी म्हणाल्या की, सौम्य लक्षणे असलेल्या रुग्णांना रुग्णालयात दाखल करण्याची गरज नाही. अशा रुग्णांवर घरीच उपचार करता येतात. त्यांचा आतापर्यंतचा अनुभव असा आहे की या प्रकाराचा परिणाम ४० किंवा त्यापेक्षा कमी वयाच्या लोकांवर होत आहे. त्यांनी उपचार केलेल्या ओमिक्रॉनची लक्षणे असलेल्या जवळजवळ निम्म्या रुग्णांनी कोरोनाची लस घेतलेली नव्हती.

दक्षिण आफ्रिकेत आढळणारा धोकादायक ओमिक्रॉन प्रकार आतापर्यंत अनेक देशांमध्ये पसरला आहे. शनिवारी जर्मनी, इटली, बेल्जियम, इस्रायल आणि हाँगकाँगमध्ये नवीन प्रकरणांची नोंद झाली. ब्रिटनमध्येही ओमिक्रॉनची दोन प्रकरणे समोर आल्यानंतर सरकारने मास्क, सोशल डिस्टन्सिंग आणि चाचणीबाबत सतर्कता दाखवली आहे. अमेरिकेतील सरकारचे सर्वोच्च संसर्गजन्य रोग तज्ञ डॉ. अँथनी फौसी म्हणाले की, अमेरिकेतही ओमिक्रॉन प्रकाराची प्रकरणे दिसली तर आश्चर्य वाटणार नाही.