अभिनेता करण मेहराचा जामीन मंजूर, पत्नीने केला होता प्राणघातक हल्ल्याचा आरोप

मुंबई : अभिनेता करण मेहरा याच्यावर पत्नी निशा रावलने प्राणघातक हल्ला केल्याचा आरोप लावला आहे. त्याप्रकरणी टेलिव्हिजन अभिनेता करण मेहराला सोमवारी रात्री गोरेगाव पोलिसांनी अटक केली होती. आता पोलिसांनी करणला जामीन मंजूर केला आहे.

सोमवारी रात्री घरगुती वादानंतर करणने आपल्या पत्नीला भिंतीकडे ढकलले. त्यामुळे तिच्या डोक्याला दुखापत झाल्यामुळे तिने पोलिसांकडे जाऊन गुन्हा दाखल केला होता. करणविरोधात आयपीसीच्या कलम 336 आणि 337 अंतर्गत मारहाण आणि प्राणघातक हल्ला केल्याप्रकरणी गुन्हा नोंदविण्यात आला होता. या जोडप्याचे लग्न होऊन आठ वर्ष झाले आहे आणि त्यांना एक चार वर्षांचा मुलगा आहे.