सुशांतच्या घराजवळ आढळलेल्या २ अज्ञातांचा शोध सुरू

सुशांतच्या मृत्यू नंतर मुंबई पोलिसांची टीम घटनास्थळी पोहोचली. काही पोलीस सुशांतच्या घरात तर काही पोलीस सुशांतचे घर ज्या इमारतीत होते त्या इमारतीच्या परिसरात उभे होते. पोलीस उपस्थित असताना दोन अज्ञात व्यक्ती इमारतीच्या परिसरात आढळल्या. या व्यक्तींपैकी एक महिला आहे आणि दुसरा पुरुष आहे. या दोघांची ओळख अद्याप पटलेली नाही. सुशांतच्या मृत्यूनंतर या दोन अज्ञातांमध्ये चर्चा झाली. महत्त्वाचे म्हणजे अज्ञात पुरुष इमारतीत गेला आणि काही वेळानंतर एक काळी पिशवी घेऊन बाहेर आला. पोलिसांच्या समोरुन हा पुरुष ती पिशवी इमारतीबाहेर घेऊन गेला. थोडया वेळाने तो पुरुष इमारतीच्या आवारात पुन्हा आला पण यावेळी त्याच्या हाती काळी पिशवी नव्हती. इमारतीत हा अज्ञात पुरुष कोणाच्या घरात गेला आणि काळ्या पिशवीतून त्याने इमारतीबाहेर काय नेले यावरुन तर्कवितर्कांना उधाण आले आहे.

सुशांत ज्या इमारतीत राहात होता तिथल्या कोणत्याही व्यक्तीने तसेच सुशांतच्या नातलगांपैकी कोणीही अद्याप कॅमेऱ्यात दिसलेल्या अज्ञात पुरुष आणि महिलेला ओळखू शकलेले नाही. त्यामुळे अज्ञातांनी सुशांत प्रकरणाशी संबंधित काही पुरावे नष्ट केले आहेत का, असा प्रश्न उपस्थित झाला आहे. मुंबई पोलिसांनी व्हिडीओत आढळलेल्या अज्ञातांविषयी मौन पाळले आहे.

सुशांतचा डेथ रिपोर्ट नोंदवणाऱ्या मुंबई पोलिसांनी त्याच्या मृत्यूची वेळ नोंदवलेली नाही. या मुद्यावरुन सुशांतच्या वडिलांच्या वकिलाने संशय व्यक्त केला आहे. वेळेचा मुद्दा कोर्टात उपस्थित करणार असल्याचे वकिलाने सांगितले.