करिनाने कधीच आमची आई होण्याचा प्रयत्न केला नाही, साराने केला खुलासा

मुंबई : बॉलिवूड अभिनेत्री करीना कपूर खान आणि सैफ अली खान यांची जोडी ही बॉलिवूडमधील एक लोकप्रिय जोडी आहे. करीना आणि सैफ या दोघांच लग्न होण्याआधी सैफला सारा अली खान आणि इब्राहम खान ही दोन मुलं होती. ‘कॉफी विथ करण’ या शोमध्ये साराने तिच्या आणि करीनाच्या नात्याबद्दल सांगताना अनेक खुलासे केले.

सारा आणि सैफ दिग्दर्शक करण जोहरच्या ‘कॉफी विथ करण’ या टॉक शोमध्ये सहभागी झाले होते. त्यावेळी करणने साराला “करीनाला तू छोटी आई म्हणून हाक मारते का? असा प्रश्न विचारला. त्यावर हसत सारा म्हणाली, “माझ्या वडिलांनी माझ्यावर कधीही करीना आमची दुसरी आई आहे असा दबाव टाकला नाही. त्यामुळे आम्हाला असं कधी वाटलंच नाही की आम्ही करिनाला आई म्हणून हाक मारावी. जर मी करीनाला छोटी आई म्हणून हाक मारली तर करीनाला धक्का बसेल. आणि ती म्हणेल काय? नाही. मी करीनाला के किंवा करीना नावाने हाक मारते. आम्ही एकमेकींच्या चांगल्या मैत्रिणी आहोत. जेव्हा करीना माझ्याशी पहिल्यांदा बोलली होती तेव्हा ती म्हणाली होती की, हे बघ तुझी आई खूप छान व्यक्ती आहे. मला फक्त तुझ्यासोबत मैत्री करायची आहे. तिने कधीच आमची आई होण्याचा प्रयत्न केला नाही. जर मी तिला छोटी आई वगैरे म्हणाले असते तर कदाचित ती स्वतःच माझ्यावर वैतागली असती.”