मुकेश खन्ना यांच्यावर कोसळला दु: खाचा डोंगर, मोठी बहीण कमल कपूर यांचे कोरोनाने निधन

मुकेश खन्ना यांच्या मृत्यूच्या खोट्या बातम्यांमुळे काल सर्वजण आश्चर्यचकित झाले होते. पण आता त्यानंतर 24 तासातच मुकेश खन्ना यांच्यावर दु: खाचा डोंगर कोसळला आहे. दिल्लीत राहणारी मुकेश खन्ना यांची मोठी बहीण कमल कपूर यांचे निधन झाले आहे. त्यांना कोरोनाची लागण झाली होती. मुकेशने सोशल मीडियाच्या माध्यमातून ही माहिती शेअर केली.

कमल कपूर यांना श्वास घेण्यास त्रास होत होता. मुकेश खन्ना यांच्या मोठ्या बहिणीला 12 दिवसांपूर्वी कोरोनाचा संसर्ग झाला होता. त्यातून त्या बऱ्या झाल्या होत्या. परंतु, त्यांना एक दिवसापूर्वी अचानक श्वास घेण्यास त्रास होऊ लागला. त्यांना पुन्हा रुग्णालयात नेण्यात आले, पण त्यांना कोठेही आयसीयू बेड उपलब्ध होऊ शकला नाही. ज्यामुळे त्यांना वाचवता आले नाही आणि कमल कपूर यांचे निधन झाले.

मुकेश खन्ना यांचा भाऊ सतीश यांचा तीन आठवड्यांपूर्वी हार्टअटॅकमुळे मृत्यू झाला होता. त्या अगोदर सतीश यांना कोरोनाची लागण झाली होती. सतीश घरीच विलगीकरणात होते आणि सर्व प्रोटोकॉल पाळत औषधे पण घेत होते. नंतर 8 एप्रिल रोजी त्यांचा कोरोना अहवाल निगेटिव्ह आला होता. मात्र, त्यानंतर त्यांचे निधन झाले.

मुकेश खन्ना यांनी कोरोना लसीचे दोन्ही डोस घेतले असून गेल्या एका वर्षापासून ते कोणत्याही पार्टीला किंवा कार्यक्रमाला गेलेले नाहीत.