अभिनेत्री सोनाली कुलकर्णीच्या वडिलांवर चाकू हल्ला

पुणे : अभिनेत्री सोनाली कुलकर्णी हिचे वडिल मनोहर कुलकर्णी (63 वर्ष) यांच्यावर चाकू हल्ला झाल्याची धक्कादायक घटना घडली आहे. निगडी येथील त्यांच्या राहत्या घरात ही घटना घडली आहे. हा हल्लेखोर सोनालीचा चाहता असल्याचे सांगत होता. त्याने सोनालीच्या वडिलांवर चाकूने हल्ला केला. यात ते जखमी झाले आहेत.

पोलिसांनी दिलेल्या माहितीनुसार, सोनाली कुलकर्णीच्या वडिलांचे पुण्यातील निगडी प्राधिकरण भागातील सेक्टर क्रमांक 25 येथे घर आहे. आरोपी अजय शेगटे सकाळी सात वाजण्याच्या सुमारास अचानक त्यांच्या दाराजवळ आला. त्यावेळी सोनालीचे आई-वडील घरात होते. मनोहर कुलकर्णी यांनी अजयला रोखण्याचा प्रयत्न केला असता माथेफिरु अजयने त्यांच्यावर चाकूने हल्ला केला. यात ते किरकोळ जखमी झाले. याप्रकरणी कुलकर्णी यांनी निगडी पोलिसांत चोरीच्या उद्देशाने हल्ला झाल्याची तक्रार दाखल केली आहे.

कुलकर्णी यांच्या इमारतीतील रहिवाशांना याची माहिती मिळताच त्यांनी आरोपीला पकडले. त्यानंतर पोलिसांना घटनेची माहिती देण्यात आली. पोलिसांनी तात्काळ घटनास्थळी धाव घेत आरोपीला ताब्यात घेतले. यावेळी आरोपीने आपण सोनाली कुलकर्णीचा फॅन असल्याचे सांगितले. तपासादरम्यान आरोपीकडे खोटे पिस्तूल आणि चाकू पोलिसांना आढळले आहे. निगडी पोलीस याप्रकरणी अधिक तपास करत आहेत.