अभिनेत्री रश्मिरेखा ओझाची गळफास घेऊन आत्महत्या, मनोरंजनविश्वात खळबळ

Rashmirekha Ojha Suicide : आणखी एक प्रसिद्ध बंगाली अभिनेत्री रश्मिरेखा ओझाबद्दल धक्कादायक बातमी येत आहे. रश्मिरेखाने राहत्या घरी गळफास घेऊन आत्महत्या केली आहे. रश्मिरेखा यांचा मृतदेह त्यांच्या नयापल्ली भागातील भाड्याच्या घरात आढळून आला. मीडिया रिपोर्ट्समध्ये सांगितले जात आहे की, ती या घरात तिच्या बॉयफ्रेंडसोबत राहत होती. पोलिसांना रश्मिरेखाची सुसाईड नोटही सापडली असून त्यात आत्महत्येचे कारण सांगितले आहे. मात्र, रश्मिरेखाच्या कुटुंबीयांना वेगळाच संशय आहे.

सुसाईड नोटमध्ये काय लिहिले आहे?

या प्रकरणी माहिती देताना पोलिसांनी सांगितले की, 23 वर्षीय अभिनेत्री 18 जूनच्या रात्री तिच्या भाड्याच्या घरात लटकलेल्या अवस्थेत सापडली होती. अभिनेत्रीने एक चिठ्ठी सोडली आहे, ज्यामध्ये तिच्या मृत्यूला कोणीही जबाबदार नाही असे नमूद केले आहे. अभिनेत्रीने सुसाईड नोटमध्ये काम न मिळाल्याचे देखील लिहिले होते. मात्र, रश्मिरेखा यांच्या कुटुंबीयांना हे प्रकरण वेगळेच वाटत आहे.

कुटुंबीयांना वेगळाच संशय
आपल्या मुलीच्या मृत्यूमध्ये तिचा लिव्ह-इन पार्टनर संतोष पात्रा याची भूमिका असल्याचा आरोप अभिनेत्रीच्या वडिलांनी केला आहे. मीडिया रिपोर्ट्सनुसार, वडिलांचे म्हणणे आहे की त्यांना मुलीच्या लिव्ह-इन पार्टनरबद्दल माहिती नव्हती, परंतु त्यांना घरमालकाकडून कळले आहे की ती संतोष पात्रा नावाच्या मुलासोबत लिव्ह-इनमध्ये होती.

जगतसिंगपूर जिल्ह्यातील रहिवासी असलेली रश्मिरेखा ओझा ‘केमिती कहीबी कहा’ या टीव्ही मालिकेत दिसली आहे. अशा अनेक शोमध्ये आपल्या दमदार अभिनयाने तिने एक वेगळी ओळख निर्माण केली आहे.