अभिनेत्री दिव्या भटनागर हिचं कोरोनामुळे निधन

मुंंबई : टीव्ही विश्वातून दु:खद बातमी समोर आली आहे. मागील काही दिवसांपासून व्हेंटिलेटरवर असणारी अभिनेत्री दिव्या भटनागर हिचं आज निधन झालं. छोट्या पडद्यावरील ‘ये रिश्ता क्या कहलाता हे’ मालिकेत ‘गुलाबो’ची भूमिका करणाऱ्या दिव्याला कोरोनाची लागण झाली होती. तिच्यावर मुंबईतील गोरेगाव येथील एसआरव्ही रुग्ण्लयात उपचार सुरु होते.

दिव्याला २६ नोव्हेंबरला रुग्णालयात दाखल करण्यात आलं होतं. दिव्याला रुग्णालयात दाखल केलं तेव्हा तिची ऑक्सिजनची पातळी ७१ पर्यंत खाली आली होती. २८ नोव्हेंबरला तिचा कोरोना अहवाल पॉझिटिव्ह आला होता. तिला न्यूमोनियाची देखील लागण झाली होती. त्यामुळे तिची प्रकृती अधिकच बिघडत गेली. ज्यामुळे तिचे निधन झाले. दिव्याचा मित्र युवराज रघुवंशी याने तिच्या निधनाच्या वृत्ताला दुजोरा दिला आहे. युवराजने सांगितले की, ‘दिव्याचं निधन आज पहाटे ३ वाजेच्या सुमारास झाले. दिव्याला ७ हिल्स रुग्णालयात हलविण्यात आले होते. रात्री २ वाजता अचानक तिची प्रकृती अधिक बिघडली. तिला श्वास घेण्यास बराच त्रास होत होता, त्यानंतर ३ वाजता तिचं निधन झालं. ही बातमी माझ्यासाठी आणि दिव्याच्या कुटूंबासाठी मोठा धक्का आहे.’

दिव्याने ‘ये रिश्ता क्या कहलाता है’ सेठजी, सिलसिला प्यार का, कभी हां कभी नां, कभी सौतन कभी सहेली, प्रीतो, श्रीमान श्रीमती फिर से, तेरा यार हूं यासारख्या मालिकांमध्ये काम केले होते.