तरुणाने पत्नीची दिवसाढवळ्या चॉपरने भोसकून केली हत्या, त्यानंतर…

जळगाव : एका तरुणाने पत्नीची बाजारात दिवसाढवळ्या चॉपरने भोसकून हत्या केली. बुधवारी दुपारी १.३० वाजता पाळधी गावात ही खळबळजनक घटना घडली आहे. त्यानंतर आरोपीने पत्नीच्या माहेरी जाऊन मेहुण्यावर चॉपरने वार केले. त्यानंतर पत्नी जिंवत आहे का ते पाहण्यासाठी पुन्हा हा तरुण बाजारात आला, त्यावेळी ग्रामस्थांनी त्याला चांगला चोप देत पोलिसांच्या ताब्यात दिले. या घटनेत पूजा सुनिल पवार (वय २६) यांचा मृत्यू झाला असून शंकर भिका चव्हाण (वय २०) गंभीर जखमी झाला आहे.

मिळालेल्या माहितीनुसार, पूजा आणि सुनिल पवार (वय ३४) या दाम्पत्यामध्ये काही दिवसांपासून वाद सुरू होता. त्यामुळे गेल्या १६ फेब्रुवारीपासून पुजा माहेरी म्हणजे पाळधीत राहत होती. तरीही या दोघांमध्ये वाद सुरूच होते. दरम्यान, सुनिलच्या सततच्या त्रासाला कंटाळून पुजा व तिच्या कुटुंबीयांनी सुनिलविरोधात पाळधी पोलिसांकडे तक्रार केली होती. त्याबाबत चौकशीसाठी पोलिसांनी सुनिलला बुधवारी बोलावले होते. मात्र, तो पोलिस ठाण्यात न जाता पूजाला मारण्यासाठी गेला. दुपारी दीड वाजता सुनिलची पत्नी पुजा लहान मुलीसोबत एका दुकानात खरेदी करत होती. तिथे जाऊन सुनिलने तिच्यावर चॉपरने वार केले. त्यामुळे गंभीर जखमी होऊन पूजा तेथेच कोसळली. तर सुनिल चॉपर घेऊन पूजाच्या घरी गेला. तिथे त्याने मेहुणा शंकर याच्या पोटात चॉपरने तीन वार केले आणि निघून गेला.

त्यानंतर हा विक्षिप्त तरुण पत्नी जिवंत आहे की मृत पावली हे पाहण्यासाठी पुन्हा घटनास्थळी आला. यावेळी काही जणांनी सुनिलला पकडून चोप दिला आणि त्याला पोलिसांच्या ताब्यात दिले. दरम्यान, पूजा आणि शंकर यांना रुग्णवाहिकेतून शासकीय रुग्णालयात नेले. परंतु, तिथे डॉक्टरांनी पूजाला मृत घोषित केले. शंकरवर खासगी रुग्णालयात उपचार सुरु आहेत. पोलिसांनी रुग्णालयात येऊन जखमी शंकर याचा जबाब नोंदवून घेतला. पोलिसांनी गुन्हा दाखल करून पुढील तपास सुरु केला आहे.