भयंकर! ‘मला मुलगी हवी होती’ असे म्हणत बापानेच केली एक वर्षाच्या मुलाची हत्या

नागपूर : मला मुलगी हवी होती, तू मुलगा जन्माला घातला असे म्हणत मद्यपी बापाने एक वर्षीय मुलाची हत्या केली आहे. या आरोपीच्या पत्नीच्या तक्रारीवरून खापा पोलिसांनी गुन्हा दाखल केला असून आरोपीला अटक करण्यात आली आहे. नागपूर जिल्ह्यातील सावनेर तालुक्यात खापा पोलीस स्टेशनच्या हद्दीत ही भयंकर घटना घडली आहे. सत्यम भजन कौरती (1 वर्ष) असे मृत मुलाचे नाव आहे.

मिळालेल्या माहितीनुसार, आरोपी भजन कौरती हा काल संध्याकाळी दारूच्या नशेत घरी आला. घरी आल्यानंतर त्याने पत्नीसोबत वाद घालण्यास सुरुवात केली आणि पुन्हा दारू पिण्यासाठी पत्नीकडे पैसे मागितले. मात्र त्याच्या पत्नीने पैसे देण्यास नकार दिल्यामुळे त्याला राग अनावर झाला. त्याने मला मुलगी हवी होती, तू मुलाला जन्म दिला, असं म्हणत भांडण सुरु केलं. त्यानंतर त्याने एक वर्षाच्या सत्यमला उचलून अंगणातील दगडावर फेकलं. यात सत्यमच्या डोक्याला जबर मार लागल्याने त्याचा जागीच मृत्यू झाला.